پەريزات قايراتتىڭ «ءبىز بىرگەمىز» قوعامدىق بىرلەستىگى تاراتىلدى - سوت
استانا. KAZINFORM - استانا قالاسىنىڭ مامانداندىرىلعان اۋدانارالىق ەكونوميكالىق سوتى ادىلەت دەپارتامەنتىنىڭ «Biz birgemiz Qazaqstan 2030» قوعامدىق بىرلەستىگىن تاراتۋ تۋرالى تالابىن قارادى.
ءىس ماتەريالدارىنا سايكەس، وسى زاڭدى تۇلعانى باستاپقى مەملەكەتتىك تىركەۋ 2021 -جىلعى 11-قازاندا وتكىزىلدى. بىرلەستىكتىڭ قۇرىلتايشىلارى - 10 ادام، ولاردىڭ ەسىمدەرى قايرات پەريزاتتى قوسا العاندا، قۇرىلتاي جينالىستارىنىڭ حاتتامالارىندا كورسەتىلگەن. قىلمىستىق ءىستى تەرگەۋ بارىسىندا قولجازبا ساراپتاماسى جۇرگىزىلىپ، قورىتىندىسىنا سايكەس، 10 قۇرىلتايشىنىڭ 9 ىنىڭ اتىنان قۇرىلتاي قۇجاتتارىنا قايرات پەريزات قول قويعان.
- زاڭدى تۇلعا ازاماتتىق كودەكستىڭ 49-بابىنا سايكەس، زاڭدى تۇلعا ونى قۇرۋ كەزىندە جىبەرىلگەن، جويىلمايتىن سيپاتتاعى زاڭ بۇزۋشىلىقتارعا بايلانىستى جارامسىز دەپ تانىلعان جاعدايدا، سوت شەشىمى بويىنشا تاراتىلۋى مۇمكىن. ق ر جوعارعى سوتىنىڭ «سوتتاردىڭ سالىق زاڭناماسىن قولدانۋدىڭ كەيبىر ماسەلەلەرى تۋرالى» نورماتيۆتىك قاۋلىسىنىڭ 12-تارماعىنا سايكەس - زاڭدى تۇلعانى قۇرۋعا (قايتا تىركەۋگە) قاتىسى جوق زاڭدى تۇلعانى باسشىسىن جانە (نەمەسە) قۇرىلتايشىسىن (قاتىسۋشىسىن) كورسەتە وتىرىپ تىركەۋ (قايتا تىركەۋ) زاڭدى تۇلعانى تاراتۋ (جارامسىز دەپ تانۋ) ءۇشىن نەگىز بولىپ تابىلادى. بىرلەستىكتى قۇرۋ كەزىندە انىقتالعان بۇزۋشىلىقتاردى ەسكەرە وتىرىپ، سوت «Biz birgemiz Qazaqstan 2030» قوعامدىق بىرلەستىگىن ءماجبۇرلى تۇردە تاراتۋ تۋرالى شەشىم قابىلدادى. شەشىم زاڭدى كۇشىنە ەنگەن جوق، - دەلىنگەن اۋدانارالىق ەكونوميكالىق سوت ۇكىمىندە.
ەسكە سالساق، ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتقانى 14-قاراشادا بەلگىلى بولدى.
ارتىنشا پەريزات قايرات پاراسپورت فەدەراتسياسىنداعى قىزمەتىنەن الىندى.
سونىمەن قاتار سوت سانكتسياسىمەن پەريزات قايراتتىڭ دۇنيە-مۇلكىنە شەكتەۋ قويىلعانى انىقتالدى.
بۇعان دەيىن پەريزات قايرات پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناۋدى ۇيىمداستىرعانى تۋرالى حابارلاعان ەدىك. بۇل ەپيزود بويىنشا پەريزات قايرات 200 ميلليون تەڭگەدەن اسا قاراجاتتى جىمقىردى دەپ كۇدىكتەلۋدە.
كەيىننەن پەريزات قايراتتىڭ ءىسى 100 تومنان اسقانى ءمالىم بولدى.
