پەريزات قايرات ءىسى: قازاقستاندا وسىنداي قانشا قايىرىمدىلىق قورى بار؟

استانا. KAZINFORM - قايىرىمدىلىق قورىن باسقارعان پەريزات قايراتقا قاتىستى ىستەن كەيىن جۇرتتىڭ كوكەيىندە قايىرىمدىلىق قورلارعا دەگەن كۇمان قالىپتاستى.

instagram.com/01pk
instagram.com/01pk

Massaget.kz ءتىلشىسى قازاقستاندا وسىنداي قانشا قور بارىن انىقتادى.

قازاقستاندا قانشا قايىرىمدىلىق قورى بار؟

ادىلەت مينيسترلىگىنىڭ Massaget.kz-كە بەرگەن رەسمي جاۋابىنا سۇيەنسەك، 2024-جىلعى جەلتوقسانداعى مالىمەت بويىنشا قازاقستاندا اتاۋىندا «قايىرىمدىلىق» (قورلار، مەكەمەلەر) ءسوزى بار 1353 زاڭدى تۇلعا تىركەلگەن:

2023-جىلى 504 ءى تىركەلگەن؛

2024-جىلى 427 ءسى تىركەلگەن.

ەڭ كوپ قور قاي قالالاردا تىركەلگەن؟

ەڭ كوپ قور استانا، الماتى، شىمكەنت قالالارىندا تىركەلگەنى بەلگىلى بولدى.

قايىرىمدىلىق قورىن تىركەۋ ءۇشىن قانداي تالاپ قويىلادى؟

ادىلەت مينيسترلىگىنىڭ مالىمەتىنە سۇيەنسەك، قوردى مەملەكەتتىك تىركەۋ ءۇشىن مىنا قۇجاتتار ۇسىنىلادى:

جارعى،

قۇرىلتاي شارتى (قۇرىلتايشىلار سانى بىرەۋدەن كوپ بولعان كەزدە)،

جارعىنى بەكىتۋ تۋرالى ۋاكىلەتتى ورگاننىڭ شەشىمى،

اتقارۋشى ورگاندى تاعايىنداۋ تۋرالى القالى ورگاننىڭ (قامقورشىلىق كەڭەستىڭ) شەشىمى،

مەملەكەتتىك تىركەۋ ءۇشىن الىمنىڭ بيۋجەتكە تولەنگەنىن راستايتىن تۇبىرتەك نەمەسە وزگە دە قۇجات.

قانشا قايىرىمدىلىق قورى تىركەۋدەن شىعارىلعان؟

كەيىنگى ەكى جىلدا ەرىكتى تۇردە 455، ماجبۇرلەۋ تارتىبىمەن 250 قور تاراتىلعان.

قايىرىمدىلىق قورلارىن كىم قاداعالايدى؟

رەسمي مالىمەتكە سۇيەنسەك، مادەنيەت جانە اقپارات مينيسترلىگى قايىرىمدىلىق، ۆولونتەرلىك قىزمەت، اقپاراتقا قول جەتكىزۋ، ونلاين پلاتفورمالار سالالارىنداعى باسشىلىقتى، مەملەكەتتىك رەتتەۋدى جۇزەگە اسىرادى.

پەريزات قايرات تۋرالى نە بەلگىلى؟

پەريزات قايرات - Biz Birgemiz Qazaqstan قايىرىمدىلىق قورىنىڭ ءتورايىمى، قازاقستانداعى بەلسەندى ەرىكتىلەر قوزعالىسىنىڭ جەتەكشىسى رەتىندە تانىمال. ول سۋ تاسقىنىنان زارداپ شەككەندەرگە كومەك كورسەتۋ، گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ، قوعامدا بەدەلگە يە بولدى.

14-قاراشادا قارجىلىق مونيتورينگ اگەنتتىگى پەريزات قايرات 1,5 ميللياردتى جىمقىردى دەگەن كۇدىككە ىلىنگەنىن حابارلادى.

ول 2023-جىلعى قاراشادا پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناپ، ونىڭ 200 ميلليونىن قالتاسىنا باسقان دەگەن كۇدىككە ءىلىندى. ق م ا دەرەگىنشە، 2023-جىلعى جەلتوقساندا وسى اقشا ەسەبىنەن پەريزات قايرات Sensata Plaza ەليتالىق كەشەنىنەن 49 ميلليون تەڭگەگە ءۇش بولمەلى پاتەر جانە 30 ميلليون تەڭگەگە Mercedes-Benz EQE 5004 Matic ماركالى جاڭا كولىك ساتىپ العان.

16-قاراشادا استانا قالاسىنىڭ تەرگەۋ سوتى پەريزات قايرات 2 ايعا قاماۋعا الىنعانىن حابارلادى.

13-جەلتوقساندا پەريزات قايراتتىڭ ەليتالىق پاتەرلەرى، قىمبات كولىكتەرى بۇعاتتالدى. سونداي-اق پەريزات قايراتتىڭ تۇرعىلىقتى جەرىن ءتىنتۋ بارىسىندا قايىرىمدىلىققا جينالعان قاراجاتقا ساتىپ الىنعان قىمبات تەحنيكا، Cartier ،Graff ،Rolex ،Bulgari ،Gucci ،Louis Vuitton، Versace ،Chopard ،Hermes ،Dolce Gabbana ،Prada جانە ت. ب. سياقتى تانىمال الەمدىك برەندتەردىڭ كيىمدەرى، اياق كيىمى، زەرگەرلىك بۇيىمدارى، سومكەلەرى تاركىلەندى.

Massaget.kz پەريزات قايراتتىڭ گاردەروبىنا شولۋ جاسادى. ونىڭ سومكەلەرىنىڭ قۇنىنا ءىرى قالالاردان پاتەر الۋعا بولادى.

كەيىنىرەك ءماجىلىس دەپۋتاتى، بۇرىنعى وقۋ- اعارتۋ ءمينيسترى اسحات ايماعامبەتوۆ جۋىردا ۇستالعان پەريزات قايرات ىسىنە قاتىستى پىكىر ءبىلدىرىپ، قايىرىمدىلىق قورلارىنا قاتىستى ماسەلەنى زاڭمەن رەتتەۋ كەرەك ەكەنىن جەتكىزدى.

سوڭعى جاڭالىقتار