ەرەيمەنتاۋ اۋدانىندا ەسىرتكى زەرتحاناسى انىقتالدى
استانا. KAZINFORM - بيىلعى قىركۇيەكتە ۇلتتىق قاۋىپسىزدىك كوميتەتىنىڭ (ۇ ق ك) اقمولا وبلىسى بويىنشا دەپارتامەنتى ەرەيمەنتاۋ اۋدانىنداعى پروكۋراتۋرا ورگاندارى ۇيلەستىرۋىمەن سينتەتيكالىق ەسىرتكى وندىرىسىنە قاتىستى جاسىرىن زەرتحانانىڭ ارەكەتىن توقتاتتى.
ق ر ۇلتتىق قاۋىپسىزدىك كوميتەتى باسپا ءسوز قىزمەتىنىڭ حابارلاۋىنشا، ەسىرتكى زاتىنىڭ كەزەكتى پارتياسىن دايىنداپ جاتقان كەزىندە قازاقستان ازاماتى ۇستالىپ، سوتتىڭ سانكسياسىمەن قاماۋعا الىندى.
7 كەلىگە جۋىق «مەفەدرون» جۇيكەگە اسەر ەتەتىن زاتى، 100 ليتردەن استام پرەكۋرسور، سونداي-اق سينتەتيكا جاساۋعا ارنالعان زەرتحانالىق جابدىقتار تاركىلەنگەن.
قازاقستان رەسپۋبليكاسى قىلمىستىق كودەكسىنىڭ 297-بابىنىڭ 3- ءبولىمى بويىنشا سوتقا دەيىنگى تەرگەپ-تەكسەرۋ جۇرگىزىلۋدە.
«قىلمىستىق-پروتسەستىك كودەكستىڭ 201-بابىنىڭ 1-بولىمىنە سايكەس وزگە اقپارات جاريا ەتۋگە جاتپايدى»، - دەلىنگەن ۇ ق ك باسپا ءسوز قىزمەتى تاراتقان حابارلامادا.
وسىعان دەيىن ۇ ق ك وكىلدەرىنىڭ اسا ءىرى كولەمدە ەسىرتكى ساۋدالاعان قىلمىستىق توپتىڭ جولىن كەسكەنىن حابارلادىق.
