ريم پاپاسى قايتىس بولدى
استانا. KAZINFORM - ريم پاپاسى فرانسيسك 88 جاسقا قاراعان شاعىندا كوز جۇمدى، دەپ حابارلايدى ت ا س س.
VaticanNews مالىمەتىنشە، ريم پاپاسى 2025 -جىلعى 21 -ساۋىردە، دۇيسەنبى كۇنى ۆاتيكانداعى كاسا- سانتا- مارتا رەزيدەنتسياسىندا دۇنيەدەن وزعان.
پونتيفيك فرانسيسك 1936-جىلى 17-جەلتوقساندا ارگەنتينادا دۇنيەگە كەلگەن. 2013 -جىلعى 13-ناۋرىزدا ريم پاپاسى اتاندى. سايلانعانعا دەيىن 1998-2013 -جىلدارى ارگەنتينانىڭ پريماسى جانە بۋەنوس- ايرەستىڭ ارحيەپيسكوپى بولدى.
كەشە عانا پاسحا جەكسەنبىسىندە پاپا فرانسيسك ءداستۇرلى باتاسىن بەرۋ ءۇشىن ۆاتيكانداعى اۋليە پەتر الاڭىنا جينالعان سەنۋشىلەردىڭ الدىنا شىققانى حابارلانعان ەدى.
ەسكە سالا كەتەيىك، 14-اقپاندا پاپا فرانتسيسك اۋىر برونحيتكە بايلانىستى ريمدەگى دجەمەللي اۋرۋحاناسىنا جاتقىزىلعان بولاتىن. ول 23 - ناۋرىزدا 38 كۇندىك ەمنەن كەيىن ەكىجاقتى پنيەۆمونيا دياگنوزىمەن اۋرۋحانادان شىقتى.
جاس كەزىندە پونتيفيكتىڭ وكپەسىنىڭ ءبىر بولىگىن الىپ تاستاعان جانە ءومىر بويى تىنىس الۋ پروبلەماسىنان زارداپ شەگىپ كەلدى.
سوڭعى ۋاقىتتا ريم پاپاسى ەم قابىلداپ جۇرگەنى جانە تەك ماڭىزدى شارالاردا عانا قىسقا ۋاقىتقا كوپشىلىك الدىنا شىعىپ جۇرگەنى ايتىلدى.
