ريم پاپاسى فرانتسيسك الەم حالقىنىڭ ەسىندە بەيبىتشىلىكتىڭ جاقتاۋشىسى رەتىندە قالادى - توقايەۆ
استانا. KAZINFORM - مەملەكەت باسشىسى ريم پاپاسى فرانتسيسكتىڭ قايتىس بولۋىنا بايلانىستى كوڭىل ايتتى. بۇل تۋرالى اقوردانىڭ باسپا ءسوز قىزمەتى حابارلادى.
قاسىم-جومارت توقايەۆ ريم پاپاسى فرانتسيسكتىڭ قايتىس بولعانى تۋرالى سۋىت حاباردى تەرەڭ كۇيزەلىسپەن قابىلداعانىن جەتكىزدى. پرەزيدەنتتىڭ ايتۋىنشا، پونتيفيك ادىلەت پەن مەيىرىمنىڭ، گۋمانيزمنىڭ ىزگى مۇراتتارىن ىلگەرىلەتۋگە ولشەۋسىز ۇلەس قوسقان اسا كورنەكتى رۋحاني تۇلعا ەدى.
- مەن ريم پاپاسىمەن كەزدەسۋلەرىمدى جانە ونىڭ 2022-جىلى قازاقستانعا جاساعان ءدىني توزىمدىلىكتىڭ، بەيبىتشىلىك پەن ءوزارا تۇسىنىستىكتىڭ سيمۆولىنا اينالعان اپوستولدىق تاريحي ساپارىن ىستىق ىقىلاسپەن ەسكە الامىن. ريم پاپاسى فرانتسيسكتىڭ ەسىمى الەم جۇرتشىلىعىنىڭ ەسىندە ءارقاشان بەيبىتشىلىكتىڭ ۇلى جاقتاۋشىسى جانە كونفەسسياارالىق ديالوگ پەن كەلىسىمنىڭ قورعاۋشىسى رەتىندە ماڭگى ساقتالادى، - دەپ جازدى پرەزيدەنت X الەۋمەتتىك جەلىسىندەگى ءوزىنىڭ پاراقشاسىندا.
ەسكە سالا كەتەيىك، بۇعان دەيىن ريم پاپاسى فرانتسيسك 89 جاسقا قاراعان شاعىندا كوز جۇمعانىن جازعان بولاتىنبىز.
