ريەلتورلىق قىزمەتتى رەتتەۋ ۇلتتىق ستاندارتىندا ولقىلىق بار - ساراپشى

استانا. KAZINFORM - قازاقستان ريەلتورلارى بىرلەسكەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو ءماجىلىس دەپۋتاتى ولجاس قۇسپەكوۆتىڭ ريەلتورلىق قىزمەتكە مەملەكەتتىك رەتتەۋدى ەنگىزۋ تۋرالى ۇسىنىسىنا جاۋاپ بەردى.

«ۇزاق ۋاقىتتان بەرى ناعىز كاسىبي مامانداردىڭ ساراپشىلىق قوعامداستىعىنا مۇشەمىن. سوندىقتان دا ساپاسىز قىزمەتتەن تۇتىنۋشىلار عانا ەمەس، سونىمەن بىرگە كلينەتتەرىنە كومەكتەسە الاتىن، سالانى بىلەتىن كاسىبي ماماندار دا زارداپ شەگەتىندىگىن ايتا الامىن»، - دەدى ول اگەنتتىك تىلشىسىنە بەرگەن سۇحباتىندا.

ونىڭ اتاپ وتۋىنشە مەملەكەت كاسىبي قوعامداستىق قاتىسۋشىلارىنسىز زاڭعا تاۋەلدى اكتىلەردى ازىرلەي المايدى.

«مەملەكەتتىك بيلىك ورگاندارىنىڭ بارلىق وكىلىن اشىق ءارى سىندارلى ديالوگقا شاقىرامىن. ءبىزدىڭ كاسىپ يەلەرى مۇنى شەشۋدىڭ ءالۋانتۇرلى نۇسقاسىن سان مارتە ۇسىنعان بولاتىن. ءتىپتى، زاڭعا تاۋەلدىك اكتىلەر مەن قولدانىستاعى زاڭناماعا قانداي دا ءبىر نورمالاردى دا ۇسىندى. بۇگىندە مەملەكەت ريەلتورلىق قىزمەتتى رەتتەۋدىڭ ۇلتتىق ستاندارتىن قابىلداپ وتىر. وكىنىشكە وراي، ول شيكى. وندا كوپتەگەن ولقىلىق بار. سوندىقتان دا بۇگىندە نارىقتا وسىنداي جاعداي تۋىنداپ تۇر»، - دەدى نينا لۋكيانەنكو.

ساراپشى قازىرگى ۋاقىتتا ريەلتورلىق قىزمەتتى زاڭنامالىق تۇرعىدا بەكىتۋ قاجەتتىگى تۋىنداپ وتىرعانىن ايتادى.

«قىزمەت پەن ماماندىقتىڭ ءىس جۇزىندە بار ەكەندىگىن، مەملەكەت ونى زاڭمەن بەكىتىلگەن قۇجاتتارمەن زاڭداستىرۋعا مۇددەلى ەمەستىگىن مويىنداۋ قاجەت. ويىن ەرەجەسىن تالقىلاپ، نارىقتى تازارتايىق. كاسىپ وكىلدەرى ءۇشىن دە، كليەنتتەر ءۇشىن دە قولايلى ءارى جايلى جۇمىستى بىرلەسىپ ىستەيىك»، - دەدى ول.

ايتا كەتەيىك، تاياۋدا پرەمەر-ءمينيستردىڭ ورىنباسارى - ۇكىمەت اپپاراتىنىڭ باسشىسى عالىمجان قويشىبايەۆقا ساۋال جولداعان دەپۋتات ولجاس قۇسپەكوۆ ريەلتورلىق قىزمەتتى قاتاڭ مەملەكەتتىك رەتتەۋ قاجەتتىگىن كوتەرگەن بولاتىن.