ۇرىمجىدە شاڭحاي ىنتىماقتاستىق ۇيىمىنىڭ سيفرلىق ەكونوميكا جونىندەگى فورۋمى وتەدى
استانا. KAZINFORM - قىتايدىڭ شينجاڭ-ۇيعىر اۆتونوميالىق اۋدانىنىڭ اكىمشىلىك ورتالىعى ءۇرىمجى قالاسىندا 14- 16-قىركۇيەك ارالىعىندا شاڭحاي ىنتىماقتاستىق ۇيىمىنىڭ (ش ى ۇ) سيفرلىق ەكونوميكا جونىندەگى فورۋمى وتەدى، دەپ حابارلايدى شينحۋا.
ءىس-شاراعا ش ى ۇ-عا مۇشە ەلدەردىڭ ۇكىمەتتەرى، ساراپتامالىق ورتالىقتارى، ءىرى كومپانيالارى، جوعارى وقۋ ورىندارى مەن سالالىق قاۋىمداستىقتارىنىڭ وكىلدەرى، شامامەن 500 ادام قاتىسادى.
قىتاي مەملەكەتتىك دەرەكتەر باسقارماسى باسشىسىنىڭ ورىنباسارى يۋي يننىڭ ايتۋىنشا، فورۋم باعدارلاماسىنا مينيسترلەر كەزدەسۋى، اشىلۋ سالتاناتى، پلەنارلىق وتىرىس، ءتورت تاقىرىپتىق قوسالقى فورۋم جانە باسقا دا ءىس-شارالار كىرەدى.
مينيسترلەر سيفرلىق سالاداعى ۇكىمەتارالىق ىنتىماقتاستىقتى دامىتۋ ماسەلەلەرىن تالقىلايدى. سونداي-اق قاتىسۋشىلار ش ى ۇ ەلدەرىنىڭ 2026- 2027 -جىلدارعا ارنالعان سيفرلىق ەكونوميكا سالاسىنداعى ىنتىماقتاستىعىنىڭ باسىم باعىتتارىنىڭ ءتىزىمىن ازىرلەيدى.
جەكەلەگەن سەسسيالاردا سيفرلىق بايلانىستىلىق، ەلەكتروندى ساۋدا جانە كولىك- لوگيستيكالىق دالىزدەردى دامىتۋ ماسەلەلەرى قارالادى. سونىمەن قاتار ساراپشىلار ونەركاسىپتە سيفرلىق جانە زياتكەرلىك تەحنولوگيالاردى قولدانۋ، سيفرلىق باسقارۋ جانە سيفرلىق داعدىلاردى دامىتۋ تاقىرىپتارىن تالقىلايدى.
ىسكەرلىك باعدارلاما ينتەراكتيۆتى كورمە جانە كومپانيا وكىلدەرىنىڭ كەزدەسۋلەرىمەن تولىقتىرىلادى. قاتىسۋشىلار جەرگىلىكتى سيفرلىق جوبالار مەن كاسىپورىنداردىڭ جۇمىسىمەن تانىسا الادى.
سوڭعى جىلدارى ش ى ۇ كۇن تارتىبىندە سيفرلىق ەكونوميكا باعىتى ماڭىزدى ورىن العان. 2025 -جىلعى قىركۇيەكتە تيانجيندە وتكەن ۇيىم سامميتىندە مۇشە مەملەكەتتەردىڭ كوشباسشىلارى سيفرلىق ەكونوميكانى دامىتۋ تۋرالى مالىمدەمە قابىلداعان ەدى.
ەسكە سالا كەتەيىك، ماۋسىم ايىندا قىتاي استاناسى بەيجىڭ قالاسىندا شاڭحاي ىنتىماقتاستىق ۇيىمىنىڭ قۇرىلعانىنا 25 جىل تولۋىنا ارنالعان سالتاناتتى قابىلداۋ ءوتتى.
