ريددەردەگى جالعىز قازاق مەكتەبى جابىلدى ما - اكىم جاۋابى

 شىعىس قازاقستان وبلىسىندا اپاتتى جانە ءۇش اۋىسىمدى مەكتەپ جوق. بۇل تۋرالى وبلىس اكىمى ەرمەك كوشەربايەۆ ايتىپ بەردى، دەپ حابارلايدى Kazinform اگەنتتىگى.

«وبلىستا 343 مەكتەپ بار، وندا 98 مىڭ بالا وقيدى. اپاتتى جانە ءۇش اۋىسىمدى مەكتەپتەر جوق. جىل سايىن مەكتەپتەردىڭ تەحنيكالىق جاعدايىن جاقسارتۋعا قاجەتتى قاراجات بولىنەدى. 2025 -جىلعا قاراي 5600 وقۋشىعا ارنالعان 15 مەكتەپ سالىنادى، ونىڭ ىشىندە «جايلى مەكتەپ» اياسىندا 10 مەكتەپ جوسپارلانىپ وتىر، ونىڭ ىشىندە وسكەمەن قالاسىندا 5 مەكتەپ، ريددەر قالاسىندا - 1، شەمونايحا قالاسىندا - 1، گلۋبوكوە اۋدانىندا - 3 مەكتەپ سالىنادى»، - دەدى ە. كوشەربايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونىمەن بىرگە، اكىم ريددەر قالاسىنداعى جالعىز قازاقءتىلدى «شاڭىراق» مەكتەبىنىڭ جابىلۋى تۋرالى قاۋەسەتتەرگە جاۋاپ بەردى.

«جازدىڭ كۇنى «شاڭىراق» اتتى جالعىز قازاقءتىلدى مەكتەپ جابىلدى دەگەن داۋ بولعان ەدى. بۇل دۇرىس ەمەس، انىعىندا بۇل مەكتەپ جابىلعان جوق. كەزىندە جاڭا عيماراتقا كوشىرۋ تۋرالى ۋادە بەرىلگەن جانە بۇل عيماراتقا قازاقشا جانە ورىسشا ەكى مەكتەپ قاتار كوشىرىلگەن. وندا 600 بالانىڭ 300ءى قازاقشا، 300 ءى ورىسشا ءبىلىم الۋدا. كەلەسى جىلى ريددەر قالاسىندا 1200 ورىنعا 2 مەكتەپ سالۋ جوسپارلانۋدا. سول مەكتەپتەر قۇرىلىسى اياقتالعاندا مەكتەپتەر ەكىگە بولىنەدى»، - دەپ ءتۇسىندىردى وبلىس اكىمى.

مەكتەپتەردىڭ ءبىرىن بيزنەستىڭ الەۋمەتتىك جاۋاپكەرشىلىگى شەڭبەرىندە «قازمىرىش» سالادى. تاعى ءبىر ءبىلىم وشاعى «جايلى مەكتەپ» ۇلتتىق جوباسى بويىنشا جوسپارلانعان.

سونداي- اق، بيىل وبلىستا بالاباقشالاردا جاڭا 2700 ورىن اشىلادى 2 جاستان 6 جاسقا دەيىنگى بالالاردىڭ %98,4 ى ورىنمەن قامتىلعان.

«از قامتىلعان وتباسىلاردان شىققان 5 مىڭ وتباسى بالالارى بالاباقشاعا تەگىن بارادى. 22 مىڭ وقۋشى مەكتەپ فورماسىمەن، اياق كيىممەن، جازعى لاگەرگە جولدامامەن قامتاماسىز ەتىلگەن. پرەزيدەنت تاپسىرماسىمەن 1-4- سىنىپ وقۋشىلارىنىڭ بارلىعى تەگىن تاماقپەن قامتىلعان»، - دەدى ە. كوشەربايەۆ.