ەۋرووداق سيريانىڭ جاڭا رەجيمىمەن بايلانىس ورناتۋعا تىرىسىپ جاتىر

استانا. قازاقپارات - 16-جەلتوقسان كۇنى بريۋسسەلدە العاش رەت ە و-نىڭ جاڭا جوعارعى وكىلى، ەستون ديپلوماتى كايا كاللاستىڭ توراعالىعىمەن ە و سىرتقى ىستەر كەڭەسىنىڭ وتىرىسى ءوتتى، دەپ حابارلايدى Kazinform مەنشىكتى ءتىلشىسى.

ە و-عا مۇشە 27 ەلدىڭ باسشىلارى سيريا، ليۆان، ۋكراينا جانە گرۋزياداعى جاعدايدى قاراستىردى. ەۋروپالىق ديپلوماتتار بەلارۋستەگى وقيعالار جونىندە دە پىكىر الماستى. كەزدەسۋدىڭ باستى ماسەلەلەرىنىڭ ءبىرى - سيرياداعى جاعداي. ەۋروپالىق وداق وعان ءوزىنىڭ جەتەكشى ديپلوماتتارىنىڭ ءبىرىن جىبەرگەن.

سىرتقى ىستەر جانە قاۋىپسىزدىك ساياساتى جونىندەگى جوعارعى وكىل كايا كاللاس مينيسترلەردى يوردانيا كورولدىگى ۇيىمداستىرعان حالىقارالىق كەزدەسۋگە قاتىسۋى تۋرالى حاباردار ەتتى. وندا ول سيريانىڭ جاڭا باسشىلىعىمەن ءوزارا ءىس-قيمىلدىڭ نەگىزگى قاعيداتتارىن تالقىلاۋ ءۇشىن اراب ەلدەرىنىڭ، سونداي-اق تۇركيا مەن ا ق ش-تىڭ سىرتقى ىستەر مينيسترلەرىمەن كەزدەستى.

ك. كاللاس سونداي-اق قازىرگى ۋاقىتتا ليۆاندا جۇرگەن ەۋرووداقتىڭ سيرياداعى دەلەگاتسياسىنىڭ باسشىسى (ميكاەل ونماحت، گ ف ر) داماسكىگە ەلدىڭ جاڭا بيلىگىمەن بايلانىس ورناتۋ جانە ە و حابارلامالارىن جەتكىزۋ ءۇشىن بارعانىن حابارلادى.

كەڭەستىڭ تالقىلاۋى بارىسىندا ە و-نىڭ سيريانىڭ اۋماقتىق تۇتاستىعى، تاۋەلسىزدىگى مەن ەگەمەندىگى، سونداي-اق ەسەپ بەرۋشىلىك، ينكليۋزيۆتىلىك، ايەلدەر قۇقىقتارىن قۇرمەتتەۋ قاعيداتتارى تۋرالى كەلىسىمى اتاپ ءوتىلدى.

مينيسترلەر وتپەلى پروتسەس سيريا باسشىلىعى جانە سيريالىقتاردىڭ وزدەرىنىڭ باسشىلىعىمەن جۇزەگە اسىرىلۋى ءتيىس ەكەنىن جانە سيريا حالقىنىڭ بارلىق الۋان تۇرلىلىگىمەن مۇددەلەرىن كورسەتۋى كەرەكتىگىن راستادى.

كايا كاللاس ەۋروپالىق وداقتىڭ سيريا حالقىنا گۋمانيتارلىق كومەكتىڭ ەڭ ءىرى دونورى بولىپ قالا بەرەتىنىن اتاپ ءوتتى. بۇعان ە و اساد رەجيمى قۇلاعاننان كەيىن بىردەن قۇرىلعان اۋە كوپىرى دالەل. ول ارقىلى دەنساۋلىق ساقتاۋ، ءبىلىم بەرۋ جانە باسپانامەن قامتاماسىز ەتۋدى قولداۋ ءۇشىن 100 توننا گۋمانيتارلىق كومەك جەتكىزىلگەن.

ە و وتپەلى كەزەڭدە سيريا حالقىن قولداۋ ءۇشىن 2025 -جىلى توعىزىنشى بريۋسسەل- سيريا كونفەرەنسياسىن ۇيىمداستىرادى.

كەڭەس ودان كەيىن تاياۋ شىعىس پەن گازا سەكتورىنداعى وقيعالاردى كەڭىرەك تالقىلادى.

ايتا كەتەيىك، وسىعان دەيىن بۋندەستاگ دەپۋتاتتارىنىڭ كوپشىلىگى ولاف شولتس ۇكىمەتىنە سەنىمسىزدىك ۆوتۋمىن قولداعانى ءمالىم بولدى.

اۆتور

زارينا تۋعانبايەۆا