ەۋرووداق سيرياداعى جاعدايدى تۇراقتاندىرۋ ءۇشىن سانكسيالاردى توقتاتادى
استانا. KAZINFORM - فرانسيا سىرتقى ىستەر ءمينيسترى جان- نوەل باررونىڭ مالىمدەۋىنشە، سانكتسيالاردىڭ جەڭىلدەتىلۋى ەنەرگەتيكا، كولىك جانە قارجى سەكتورلارىنا اسەر ەتەدى دەپ حابارلايدى Kazinform مەنشىكتى ءتىلشىسى.

ەۋرووداق سىرتقى ىستەر مينيسترلەرى دۇيسەنبى كۇنى بريۋسسەلدە وتكەن كەزدەسۋدە سيرياعا سالىنعان سانكسيالاردى الىپ تاستاۋ ماسەلەسىن تالقىلاي باستادى.
- سيرياعا كەلەتىن بولساق، بۇگىن ءبىز ەنەرگەتيكا جانە كولىك سەكتورلارىنا، سونداي- اق ەلدىڭ ەكونوميكاسىن تۇراقتاندىرۋدا ماڭىزدى ءرول اتقاراتىن قارجى مەكەمەلەرىنە قولدانىلعان كەيبىر سانكسيالاردى الىپ تاستاۋ، توقتاتۋ تۋرالى شەشىم قابىلدايمىز، - دەپ مالىمدەدى باررو وتىرىس الدىندا.
ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى كايا كاللاس Reuters اگەنتتىگىنە سانكتسيالاردى جەڭىلدەتۋ تۋرالى كەلىسىمگە قول جەتكىزىلەدى دەپ ۇمىتتەنەتىنىن مالىمدەدى.
بۇعان دەيىن ە و سيريانىڭ جاڭا بيلىگىن «ينكليۋزيۆتى» ساياسي پروتسەستى جۇزەگە اسىرۋعا جانە ادام قۇقىقتارىن، سونىڭ ىشىندە سيرياداعى ەتنيكالىق جانە ءدىني ازشىلىقتاردىڭ قۇقىقتارىن قۇرمەتتەۋگە شاقىردى. بريۋسسەل جانە باسقا استانالار داماسكىدەگى «حايات تاحرير اش- شام» توبى (ح ت ش - قازاقستاندا تىيىم سالىنعان ۇيىم - رەد. ) باسقاراتىن ۋاقىتشا ۇكىمەتپەن تىكەلەي بايلانىس ورناتىپ ۇلگەردى.
بريۋسسەلدەگى ديپلوماتتار شەشىم قابىلداۋ ءۇشىن كونسەنسۋس جەتكىلىكتى دەپ سانايدى، ءبىراق سانكسيالار تولىعىمەن جويىلمايتىنىن ەسكەرتتى. ونىڭ ورنىنا ولار ۋاقىتشا «توقتاتىلادى» جانە ەگەر حتش ينكليۋزيۆتى باسقارۋ تۋرالى ۋادەلەرىن ورىنداماسا، سانكسيالاردى قالپىنا كەلتىرۋى مۇمكىن «قوسالقى مەحانيزممەن» تولىقتىرىلادى.
سىرتقى ىستەر مينيسترلەرىنىڭ كەزدەسۋى ح ت ش ەل ءۇشىن ماڭىزدى دەپ سانايتىن سانكتسيالاردى جەڭىلدەتۋ تۋرالى ساياسي كەلىسىمگە اكەلەدى دەپ كۇتىلىپ وتىر.
بۇگىندە بۇرىنعى پرەزيدەنت باشار اساد بيلىگى كەزىندە سالىنعان باتىس سانكتسيالارىنىڭ قاتاڭ رەجيمى ونىڭ ەكونوميكاسىن الەمنىڭ قالعان بولىگىنەن اجىراتىپ وتىر. سيريادا 13 جىلعا سوزىلعان ازاماتتىق سوعىس كەزىندە باتىس مەملەكەتتەرى سيرياعا ەكسپورتتى كۇرت شەكتەپ، ديپلوماتيالىق جانە قارجىلىق بايلانىستاردى ءۇزدى.
ەسكە سالا كەتسەك، 2024 - جىلدىڭ 8 - جەلتوقسانىندا سيريا پرەزيدەنتى باشار اساد ەل استاناسىنان كەتىپ قالدى.