ۋرولوگ مامان ەر ادامدارعا ۇنەمى قايتالايتىن ادەتىنە قاتىستى ەسكەرتۋ جاسادى
استانا. KAZINFORM - ەر ادامدار كوبىنە وزدەرىنىڭ ەموتسيالارىن سىرتقا بىلدىرمەي، سترەسكە ءجيى توتەپ بەرەدى. ال بۇل ادەت ولاردىڭ رەپرودۋكتيۆتى قابىلەتىنە جانە پوتەنتسيالىنا تەرىس اسەرىن بەرەتىنى بەلگىلى بولدى.
بۇل تۋرالى مەديتسينا عىلىمدارىنىڭ دوكتورى، ۋرولوگ نيكولاي گريگوريەۆ Lenta.ru سايتىنا بەرگەن سۇحباتىندا ايتتى.
دارىگەر سترەستىڭ قان قۇرامىنا شامادان تىس ادرەنالين مەن كورتيزول گورموندارىنىڭ بولىنۋىنە اسەر ەتىپ، ونىڭ دەڭگەيىنىڭ جوعارىلاۋى تەستوستەروننىڭ بولىنىسىنە كەرى اسەرىن بەرەتىنىن ايتتى. ال بۇل جايت ساۋ جانە بەلسەندى سپەرماتوزويدتاردىڭ سانىن ازايتاتىنىن ءتۇسىندىردى. ونىڭ ايتۋىنشا، تەستوستەرون جىنىستىق فۋنكسياعا عانا ەمەس، سونىمەن قاتار سۇيەكتەر مەن بۇلشىقەتتەردىڭ بەلسەندىلىگىنە، زەيىنگە، ميدىڭ جۇمىسىنا جاۋاپ بەرەدى.
«تەستوستەرون ءبولىنۋى بۇزىلعان كەزدە ادام اگرەسسيۆتى، مازاسىز ءتىپتى جىلاۋىققا اينالادى. ونىڭ ءوزىن-ءوزى باعالاۋى ناشارلاپ، كوڭىل كۇيى كۇرت وزگەرەدى»، - دەدى گريگوريەۆ.
ول بۇل جاعدايدى ايەلدەردەگى ەتەككىر الدىنداعى سيندروممەن سالىستىرىپ، بۇل جاعدايدىڭ نەگىزىنەن 40 جاستان اسقان ەرلەردە ءجيى كەزدەسەتىنىن اتاپ ءوتتى. سترەسس كەزىندە ەرلەر گورموندارىنىڭ تاپشىلىعى پايدا بولادى.
سترەسس پەن جۇيكە جۇقارۋى كەزىندە قاننىڭ جىنىس مۇشەلەرىنە بارۋىنا جول بەرمەيتىن تامىرلار اراسىنداعى قىسىم پايدا بولادى. وسىعان بايلانىستى ەرەكتيلدى ديسفۋنكسيا داميدى جانە تۇيىق شەڭبەر قالىپتاسادى: ەر ادام ودان سايىن ۋايىمعا بەرىلىپ، ونىڭ ەرەكتيلدى قىزمەتى زارداپ شەگەدى، سترەسس ۇستىنە سترەسس تۋادى.
ۋرولوگ ەر ادامداردى سترەستىڭ ءجيى جاعدايدا جۇرەك-قان تامىرلارى اۋرۋلارىنىڭ دامۋىنا سەبەپ بولاتىنىن ەستە ۇستاۋعا شاقىردى. تۇراقتى شارشاۋ، تىتىركەنۋ، تەرلەۋدىڭ جوعارىلاۋى، ەرەكتيلدى ديسفۋنكسيا، ەياكۋلياتسيا پروبلەمالارى جانە جىنىس ايماعىندا اۋىرسىنۋ سياقتى بەلگىلەر پايدا بولسا، ءسىز دەرەۋ مەديتسينالىق كومەككە جۇگىنۋىڭىز كەرەك دەپ كەڭەس بەردى مامان.
