پروكۋراتۋرا جاۋاپسىز اتا-انالاردان 15 بالانى تارتىپ الدى

الماتى وبلىسىندا بالالارىنا جاۋاپسىز قاراعان 51 اتا-انا اكىمشىلىك جاۋاپكەرشىلىككە تارتىلدى، دەپ حابارلايدى Kazinform.

«باقىتتى جانە قاۋىپسىز بالالىق شاق» جوباسى اياسىنداعى بىرىككەن رەيدتەردىڭ ناتيجەسىندە 51 اتا-انا، ونىڭ ىشىندە 38 تۇلعا اكىمشىلىك قۇقىقبۇزۋشىلىق تۋرالى كودەكستىڭ (ا ق ب ت ك) 127-بابى (كامەلەتكە تولماعان ادامدى تاربيەلەۋ جانە (نەمەسە) وعان ءبىلىم بەرۋ، ونىڭ قۇقىقتارى مەن مۇددەلەرىن قورعاۋ جونىندەگى مىندەتتەردى ورىنداماۋ)؛ 7 تۇلعا ا ق ب ت ك 440-بابى (الكوگولدىك ىشىمدىكتەردى ىشۋ نەمەسە قوعامدىق ورىندارعا ماساڭ كۇيدە كەلۋ)؛ 3 تۇلعا ا ق ب ت ك 73-2-بابى (ۇرىپ-سوعۋ)؛ 2 تۇلعا ا ق ب ت ك 442-بابى (كامەلەتكە تولماعانداردىڭ زاڭدى وكىلدەرىنىڭ ەرىپ ءجۇرۋىنسىز تۇنگى ۋاقىتتا ويىن-ساۋىق مەكەمەلەرىندە نەمەسە تۇرعىنجايدان تىس جەردە بولۋى)؛ 1 تۇلعا ا ق ب ت ك 73-1-بابى (دەنساۋلىققا قاساقانا جەڭىل زيان كەلتىرۋ) بويىنشا اكىمشىلىك جاۋاپكەرشىلىككە تارتىلدى. جاۋاپسىز اتا-انالاردان 15 بالا الىندى. سوتقا اتا-انا قۇقىعىن شەكتەۋ تۋرالى 7 تالاپ قويۋ بەرىلدى»، - دەلىنگەن الماتى وبلىستىق پروكۋراتۋراسى تاراتقان مالىمەتتە.

ۆەدومستۆو مالىمەتىنشە، ازىق-تۇلىك، كومىر جانە بالالارعا جىلى كيىم تۇرىندە ماتەريالدىق كومەك 86 وتباسىعا كورسەتىلدى. مەديتسينالىق تەكسەرۋدەن 901 بالا ءوتتى، 16 بالا اۋرۋحاناعا جاتقىزىلدى. باسپانا كەزەگىنە 152 بالا قويىلىپ، 2 وتباسىعا ءۇي الۋعا كومەك كورسەتىلدى.

بۇعان دەيىن الماتى وبلىسىنىڭ ىلە اۋدانىندا اشتىقتان جۇدەۋ، سويلەۋگە جانە جۇرۋگە مۇرشاسى قالماعان 6 جاسار بالا انىقتالىپ، «ەكى جاقتى پنيەۆمونيا» دياگنوزىمەن جەدەل تۇردە اۋرۋحاناعا جاتقىزىلعانىن جازعان بولاتىنبىز.