پروكۋراتۋرا بيىل زاڭسىز اينالىمنان قانشا توننادان استام ەسىرتكى تاركىلەنگەنىن ايتتى

استانا. قازاقپارات - 2024-جىلى زاڭسىز اينالىمنان 1 توننادان استام ەسىرتكى زاتتارى تاركىلەندى، ونىڭ ىشىندە 774 كەلى گەروين، 155 كەلى ماريحۋانا، 37 كەلى گاشيش جانە گاشيش مايى، 34 كەلى كوكنار، سونداي-اق 1 كەلى سينتەتيكالىق ەسىرتكى بار.

تاركىلەنگەن زاتتاردىڭ «قارا نارىقتاعى» قۇنى 7 ميلليارد تەڭگەدەن استام دەپ باعالانىپ وتىر. بۇل تۋرالى باس كولىك پروكۋراتۋراسىنىڭ باسپا ءسوز قىزمەتى ءمالىم ەتتى.

«مەملەكەت باسشىسىنىڭ تاپسىرماسىنا سايكەس، كولىك پروكۋراتۋراسى جانە باسقا دا قۇقىق قورعاۋ ورگاندارى ەسىرتكى بيزنەسىنە قارسى كۇرەستى، شەكارادا جۇكتەر مەن پوشتا جونەلتىلىمدەرىن باقىلاۋدى كۇشەيتتى، شەتەلدەن ەلىمىزگە ەسىرتكىنىڭ زاڭسىز اكەلىنۋىن بولدىرماۋ ماقساتىندا شارالار قابىلدادى»، - دەلىنگەن حابارلامادا.

يراننان گەرويننىڭ ءىرى پارتياسىن اكەلۋدىڭ جولى كەسىلدى، ونى قىلمىستىق توپ تۇرمىستىق تاۋارلار رەتىندە جاسىرۋعا تىرىسقان بولاتىن.

سونىمەن قاتار، ەۋروپا، اقش جانە تايلاندتان كەلگەن ەسىرتكى زاتتارى بار 50 دەن استام پوشتا جولدانىمدارى ۇستالدى.

مىسالى، قارجىلىق مونيتورينگ اگەنتتىگى اقش- تان ەسىرتكى زاتتارىن پوشتا ارقىلى كونتراباندالىق جولمەن جەتكىزەتىن جۇيەلى ارنانى جويدى. ناتيجەسىندە ون كۇدىكتى ۋاقىتشا ۇستاۋ يزولياتورىنا قامالىپ، 15 كەلى كاننابيس سىعىندىسى جانە 8 كەلى ماريحۋانا تاركىلەندى.

21 سوتتالۋشى تۇرمەگە قامالدى، اراسىندا شەتەل ازاماتتارى دا بار.

مەملەكەت ەسىرتكىنىڭ زاڭسىز اينالىمىن توقتاتۋ جۇمىسىن جالعاستىرىپ، باقىلاۋ شارالارىن كۇشەيتىپ، حالىقارالىق سەرىكتەستەرمەن ىنتىماقتاستىقتى ارتتىرىپ وتىر.