پروكاتتان «ءمىرجاقىپ. ويان، قازاق!» فيلمىن الىپ تاستاعانى راس پا
جەلىدە «ءمىرجاقىپ. ويان، قازاق!» اتتى ميني سەريالى فيلمدى كورسەتىلىمنەن الىپ تاستادى دەگەن اقپارات تارادى. وسى ورايدا فيلم رەجيسسەرى تۇسىنىكتەمە بەردى، دەپ حابارلايدى قازاقپارات ءتىلشىسى.

«ءمىرجاقىپ. ويان، قازاق!» فيلمى كەستەدە نەگە جوق، دەگەن سۇراقتار تاڭ اتقالى كوپتەپ كەلىپ جاتىر. شىعارماشىلىق توپ، ياعني، ءبىز پروكاتپەن اينالىسقان جوقپىز، دەسە دە، مىنا نارسەنى ايتقىم كەلەدى. فيلم 21- قىركۇيەكتەن باستاپ تۋرا ەكى اپتا بويى كينوتەاترلاردا كورسەتىلدى. نەگىزى پروكات مەرزىمى وتكەن جەكسەنبى اياقتالعان بولاتىن، الايدا كوپشىلىكتىڭ سۇرانىسىنا بايلانىستى 4- قازانعا دەيىن ۇزارتىلدى»، - دەپ جازدى اتالعان فيلم رەجيسسەرى مۇرات ەسجان Facebook پاراقشاسىندا.
ونىڭ ايتۋىنشا، 6 سەريالى تەلەحيكايادان كوركەم فيلم جاساۋ، ونى ۇلكەن ەكران ارقىلى كوپشىلىككە ۇسىنۋ «قازاقستان» تەلەراديوكورپوراتسياسىنىڭ تىكەلەي يدەياسى مەن ۇسىنىسى بولعان.
«ول ءۇشىن العىستان باسقا ايتارىمىز جوق. سوندىقتان پروكات مەرىزىمىنىڭ اياقتالۋىنان قانداي دا ءبىر استار ىزدەپ، تاراپتاردى كىنالاۋدىڭ ورنى جوق دەپ سانايمىن. ۋاقىتى مەن قارجىسىن قيىپ، كەلگەن، كورگەن، تاراتقان بارشا كورەرمەنگە العىسىمىز شەكسىز. كورىپ ۇلگەرمەگەن اعايىن ءۇشىن فيلم جاقىن ارادا «Qazaqstan» ارناسىنىڭ ەفيرىنە جانە ونلاين-پلاتفورمالارعا شىقپاق»، - دەپ ءتۇسىندىردى ول.