پروفەسسور كاكەن قامزين الاياقتاردىڭ قۇربانى بولدى - ءى ءى م ءىستى تەرگەپ جاتىر

استانا. KAZINFORM - تانىمال جۋرناليست، فيلولوگيا عىلىمدارىنىڭ دوكتورى، پروفەسسور كاكەن حامزين الماتىدا الاياقتاردىڭ قۇربانى بولدى. قازىر ءىستىڭ ءمان-جايىن قۇزىرلى ورگاندار تەرگەپ جاتىر

ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا ب ا ق وكىلى «بەلگىلى جۋرناليست، پروفەسسور كاكەن حامزين الاياقتارعا الدانىپ، جالعىز پاتەرىن ساتىپ، اقشاسىنان ايىرىلىپتى وسى وقيعاعا تۇسىنىك بەرىڭىزشى» دەگەن ساۋال قويدى.

- قىلمىس بويىنشا تەرگەۋ امالدارى ءجۇرىپ جاتىر. تەرگەۋ مۇددەسىنە بايلانىستى، قازىر ءىستىڭ ءمان-جايىن ايتا المايمىن. قىلمىستىق-پروتسەستىڭ 201-بابىنا سايكەس ءىس تەرگەلىپ جاتقان كەزدە، ءمان-جايدى جاريالاۋعا بولمايدى. بۇل بويىنشا جەدەل ىزدەستىرۋ امالدارى ءجۇرىپ جاتىر. ءبىز بۇنداي قىلمىستاردىڭ قايدان، قالاي جاسالىپ جاتقانىن بىلەمىز. قازىر قىلمىسكەرلەردىڭ اقشانى قالاي العانى، شەتەلگە ترانزاكسيامەن جونەلتىلگەنىنە قاتىستى تەكسەرۋ ءجۇرىپ جاتىر، - دەپ جاۋاپ بەردى ىشكى ىستەر مينيسترلىگى كيبەرقىلمىسقا قارسى ءىس-قيمىل دەپارتامەنتىنىڭ باستىعى جاندوس ءسۇيىنباي.

ايتا كەتسەك، بۇعان دەيىن ب ا ق بەتتەرىندە جانە الەۋمەتتىك جەلىدە پروفەسسور كاكەن حامزين الاياقتارعا الدانىپ، جالعىز ۇيىنەن ايىرىلعالى جاتىر دەگەن تاقىرىپتا كوپتەگەن جاريالانىم شىققان ەدى.

ەسكە سالايىق، قۇزىرلى ورگاندار سوڭعى كەزدەرى ينتەرنەت-الاياقتىق تۇرلەنىپ، جاڭا سيفرلىق شەشىمدەر قولدانا باستاعانىن ەسكەرتەدى.

اۆتور

داۋلەت ىزتىلەۋ