ەردوعان قازاقستان ۇستىنەن ۇشىپ بارا جاتىپ، توقايەۆقا جىلى لەبىزىن جولدادى

ق ر پرەزيدەنتىنىڭ كەڭەسشىسى - باسپا ءسوز حاتشىسى ايبەك سمادياروۆتىڭ رەسمي telegram-كانالىندا مەملەكەت باسشىسى قاسىم-جومارت توقايەۆتىڭ اتىنا تۇركيا پرەزيدەنتى رەجەپ تايپ ەردوعاننان جەدەلحات كەلىپ تۇسكەنىن ايتتى.
- كورەيا رەسپۋبليكاسىنا رەسمي ساپارمەن باعىت العان مەن تاريحي اتامەكەنىمىز - دوستاس ءارى باۋىرلاس قازاقستان اۋماعىمەن ۇشىپ بارامىن. بيىل مامىر ايىندا قازاقستانعا جاساعان مەملەكەتتىك ساپارىمنىڭ، سونداي-اق ءسىزدىڭ جاقىندا عانا تۇركى مەملەكەتتەرى ۇيىمىنىڭ 13-سامميتىنە قاتىسۋ ءۇشىن انكاراعا كەلگەن ساپارىڭىزدىڭ تابىستى ناتيجەلەرى مەن جىلى ساتتەرىن ىقىلاسپەن ەسكە الدىم. وسى ورايدا، ءسىزدىڭ دەنىڭىزگە ساۋلىق، كوڭىلىڭىزگە قۋانىش، ال باۋىرلاس قازاقستان حالقىنا باق-بەرەكە تىلەگەن ىزگى سالەمىمدى جولداعىم كەلەدى، - دەپ جازدى تۇرىك كوشباسشىسى جەدەلحاتتا.
ءوز كەزەگىندە مەملەكەت باسشىسى ت م ۇ سامميتىنە قاتىسۋ ءۇشىن انكارا قالاسىنا رەسمي ساپارمەن بارعان قازاق دەلەگاتسياسىن جىلى قارسى العان تۇركيا پرەزيدەنتىنە العىس ايتتى.
- كورەيا رەسپۋبليكاسىنا بارار جولدا قازاقستاننىڭ اۋە كەڭىستىگى ارقىلى ۇشىپ بارا جاتقان تۇركيا پرەزيدەنتى رەجەپ تايپ ەردوعاننان جىلى لەبىزگە تولى حابارلاما الدىم. مامىر ايىندا تۇركيا پرەزيدەنتىنىڭ قازاقستانعا جاساعان مەملەكەتتىك ساپارى جانە مەنىڭ جۋىردا انكاراعا جاساعان ساپارىم ەكى ەل اراسىنداعى تىعىز بايلانىستى تاعى ءبىر مارتە ايقىنداي ءتۇستى. قازاقستان حالقىنا جولداعان ىزگى تىلەكتەرى ءۇشىن جانە انكاراعا ساپارىمىز كەزىندە دەلەگاتسيامىزعا كورسەتكەن زور قوناقجايلىعى ءۇشىن پرەزيدەنت ەردوعانعا شىنايى العىسىمدى بىلدىرەمىن. الداعى ۋاقىتتا دا ەكى ەل اراسىنداعى دوستىق پەن ستراتەگيالىق ارىپتەستىكتى ودان ءارى نىعايتا تۇسۋگە نيەتتىمىن، - دەپ جازدى توقايەۆ.
ەسكە سالا كەتەيىك، 28-قازاندا قاسىم-جومارت توقايەۆ رەسمي ساپارمەن تۇركياعا باردى. مەملەكەت باسشىسىن انكارا قالاسىنداعى ەتيمەسگۋت اۋەجايىنان تۇركيا پرەزيدەنتى رەجەپ تايپ ەردوعان كۇتىپ الدى.
قاسىم-جومارت توقايەۆتى انكاراداعى پرەزيدەنت سارايىندا سالتاناتتى قارسى الۋ ءراسىمى ءوتتى.
قوس ەل مەملەكەت باسشىلارى كەلىسسوز جۇرگىزىپ، پرەزيدەنت قوناقجايلىق تانىتقانى ءۇشىن تۇركيا پرەزيدەنتىنە العىس ايتىپ، ارىپتەسى مەن بارشا تۇرىك حالقىن ۇلتتىق مەرەكە - رەسپۋبليكا كۇنىمەن قۇتتىقتادى. ءوز كەزەگىندە رەجەپ تايپ ەردوعان ەكى ەل اراسىنداعى سان قىرلى ىنتىماقتاستىقتى ودان ءارى تەرەڭدەتە تۇسۋگە نيەتتى ەكەنىن راستادى.
سونىمەن قاتار توقايەۆ تۇركى مەملەكەتتەرى ۇيىمىنىڭ 13-سامميتىنە قاتىسۋ ءۇشىن «كۋليە» سارايىنا بارىپ، ءسوز سويلەگەن بولاتىن.
پرەزيدەنت قاسىم-جومارت توقايەۆتىڭ تۇركيا رەسپۋبليكاسىنا ساپارى 30-قازاندا اياقتالدى.