ەۋروپارلامەنت ەۋروكوميسسيانىڭ جاڭا قۇرامىن بەكىتتى
استانا. KAZINFORM - بۇگىن ستراسبۋرگ قالاسىندا وتكەن ەۋروپارلامەنتتىڭ كوشپەلى وتىرىسى بارىسىندا ونىڭ پرەزيدەنتى ۋرسۋلا فون دەر ليايەننىڭ ەكىنشى مانداتى كەزىندەگى ەۋروپالىق كوميسسيانىڭ جاڭا قۇرامى بەكىتىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
قۇرامدى 370 ادام قولداپ، 282 ادام قارسى داۋىس بەرگەن، 36 دەپۋتات قالىس قالدى.
داۋىس بەرۋ الدىندا ۋ. ليايەن ءوز كومانداسى مەن باعدارلاماسىن تانىستىردى.
«ءبىز جۇمىستى دەرەۋ باستاۋعا دايىنبىز»، - دەدى ول ءوزى باسقاراتىن كوميسسيا ءارقاشان بوستاندىق، ەگەمەندىك، قاۋىپسىزدىك پەن وركەندەۋ ءۇشىن كۇرەسكە ادال بولاتىنىن اتاپ ءوتىپ.
ۋ. ليايەن ەۋروپالىق كوميسسيانىڭ ءبىرىنشى باستاماسى ا ق ش پەن قىتايدان ەۋروپانىڭ يننوۆاتسيالارداعى الشاقتىعىن ازايتۋعا، قاۋىپسىزدىك پەن تاۋەلسىزدىكتى ارتتىرۋعا جانە دەكاربونيزاتسيانى قامتاماسىز ەتۋگە ارنالعان «باسەكەگە قابىلەتتىلىك كومپاسى» بولاتىنىن جاريالادى.
ەۋروپالىق «جاسىل مامىلە» تۋرالى ايتا وتىرىپ، ول: «ءبىز ونىڭ ماقساتتارىنا جەتۋ ءۇشىن باعىتتى ۇستاۋىمىز كەرەك جانە سولاي بولادى» دەدى. ول جاسىل ونەركاسىپتىك كەلىسىمدى ەنگىزۋگە، ەۋروپالىق اۆتوموبيل ونەركاسىبىنىڭ بولاشاعى تۋرالى ستراتەگيالىق ديالوگتى باستاۋعا، باسەكەگە قابىلەتتى اينالمالى ەكونوميكا مەن ەۋروپالىق جيناق جانە ينۆەستيتسيا وداعىنىڭ قۇرۋ جولىنداعى جۇمىستى جالعاستىرۋ مىندەتىن وزىنە الدى.
الەمدە بولىپ جاتقان قاقتىعىستار تۋرالى ايتا كەلە، ۋ. ليايەن «ەۋروپا وسى سالالاردىڭ بارلىعىندا بەلسەندىرەك ءرول اتقارۋى كەرەك» دەپ، بۇل «بۇرىنعىدان دا قاجەت» ەكەنىن اتاپ ءوتتى.
ءبىزدىڭ قاۋىپسىزدىگىمىزدى نىعايتۋ شەشۋشى مانگە يە دەدى ول ەۋروپانى قورعانىسقا كوبىرەك اقشا بولۋگە شاقىرىپ.
«ەۋروپانىڭ قاۋىپسىزدىگى ءارقاشان وسى كوميسسيانىڭ باسىمدىعى بولادى»، - دەپ قوستى ول.
ۋ. ليايەن جانە ونىڭ جاڭا كومانداسىمەن تالقىلاۋدان كەيىن ەۋروپارلامەنت مۇشەلەرى كوميسسارلار القاسىن سايلادى.
كوميسسارلار القاسى ءوز مىندەتتەرىنە بيىلعى جىلدىڭ 1-جەلتوقسانىنان باستاپ كىرىسەدى دەپ كۇتىلىپ وتىر. ەۋروپارلامەنت مۇشەلەرى الداعى بەس جىلدا ەۋروكوميسسيا مىندەتتەمەلەرىنىڭ ورىندالۋىن باقىلايدى.
ەسكە سالساق، بۇعان دەيىن گەرمانيادا تۇتىنۋشىلاردىڭ سەنىم يندەكسى جۇمىس ورىندارىنىڭ قىسقارۋ قاۋپىنە بايلانىستى تومەندەگەنى حابارلاندى.
اۆتور
زارينا تۋعانبايەۆا
