ەۋروپانىڭ ەڭ داۋلەتتى ەلدەرىندە بالالار كەدەيلىگىنىڭ دەڭگەيى ءوستى

يۋنيسەف جاريالاعان سوڭعى مالىمەتكە سايكەس، 2014-2021 -جىلدار ارالىعىندا الەمنىڭ ەكونوميكاسى دامىعان ءبىرقاتار ەلدەرىندە بالالار كەدەيلىك كورسەتكىشىنىڭ كۇرت وسكەنى بايقالدى. Kazinform اگەنتتىگى بۇل تۋرالى Euronews-كە سىلتەمە جاساپ حابارلايدى.

«داۋلەتتى ەلدەردەگى بالالار كەدەيلىگى» ەسەبىندە اتاپ كورسەتىلگەن زەرتتەۋ تاڭقالدىراتىن قورىتىندى شىعاردى: ۇلى بريتانيا، يسپانيا جانە ليۋكسەمبۋرگ سياقتى الەمنىڭ كەيبىر دامىعان ەلدەرى رەيتينگتەگى ەڭ تومەنگى ورىندا تۇر.

باسقا جاعىنان العاندا، حالىقتىڭ ءال-اۋقاتىنىڭ دەڭگەيى ءبىرشاما تومەن ەلدەر، مىسالى، پولشا مەن سلوۆەنيا بالالار كەدەيلىگىمەن كۇرەستە جاقسى ناتيجەلەرگە قول جەتكىزدى. ولاردان كەيىن تىزىمدە لاتۆيا مەن وڭتۇستىك كورەيا كورسەتىلگەن.

زەرتتەۋدە ەىدۇ جانە ەو ەلدەرىندە كامەلەتكە تولماعاندار اراسىنداعى كەدەيشىلىكتىڭ كورىنىسى سيپاتتالىپ، سونداي-اق بالالارى بار وتباسىلارعا قارجىلىق قولداۋ كورسەتۋ بويىنشا مەملەكەتتىك ساياساتقا تالداۋ جۇرگىزىلدى.

باياندامادا حالىقتىڭ ءارتۇرلى ساناتتارى ءۇشىن تاۋەكەلدەر دە تالدانعان. دەرەكتەر جينالعان 38 ەلدە جالعىزباستى انالار نەمەسە اكەلەر تاربيەلەپ وتىرعان بالالاردىڭ باسقا بالالارعا قاراعاندا كەدەيشىلىكتە ءومىر ءسۇرۋ ىقتيمالدىعى ءۇش ەسە جوعارى. مۇگەدەكتىگى بار جاس ۇرپاقتار مەن ەتنيكالىق/ناسىلدىك ازشىلىقتاردىڭ بالالارى دا جوعارى تاۋەكەلگە ۇشىرايدى.

زەرتتەۋگە سايكەس، بۇل ەلدەردە 2012 -جىلدان 2019 -جىلعا دەيىن تۇراقتى ەكونوميكالىق ءوسىم بايقالعان، بۇل ولارعا 2008-2010 -جىلدارداعى رەتسەسسيانىڭ اسەرىن قالپىنا كەلتىرۋگە مۇمكىندىك بەردى.

دەگەنمەن، وسى ۋاقىت ىشىندە ءبىرقاتار ەلدەردە بالالار كەدەيلىگىنىڭ دەڭگەيى تومەندەگەنىمەن، كەيبىر ەڭ باي ەكونوميكالاردا ونىڭ كورسەتكىشتەرى كۇرت وسكەن. بايانداما سونداي-اق ۇلتتىق تابىس دەڭگەيى ۇقساس سلوۆەنيا مەن يسپانيا سياقتى ەلدەردە بالالار كەدەيلىگىنىڭ دەڭگەيىندە ايتارلىقتاي ايىرماشىلىقتار بار ەكەنىن كورسەتتى - سايكەسىنشە %10 جانە %28.

بالالاردىڭ ءومىر ءسۇرۋ جاعدايىن ەلدىڭ ءال-اۋقاتىنىڭ دەڭگەيىنە قاراماستان جاقسارتۋعا بولادى، دەلىنگەن باياندامادا.

مىسالى، ە ى د ۇ جانە ە و-نىڭ ەڭ داۋلەتتى ەلدەرى قاتارىنا جاتپايتىن پولشا، سلوۆەنيا، لاتۆيا جانە ليتۆا بالالار كەدەيلىگى دەڭگەيىنىڭ ايتارلىقتاي تومەندەۋىنە قول جەتكىزدى: پولشادا ول %38 عا، ال باسقا ەلدەردە %31 عا تومەندەدى.

وسى ارادا تابىسى جوعارى بەس ەل - ۇلى بريتانيا (%20+)، فرانسيا، يسلانديا، نورۆەگيا جانە شۆەيتساريادا (شامامەن %10+) 2014 -جىلدان بەرى تۇرمىسى تومەن وتباسىلاردا تۇراتىن بالالار سانىنىڭ ەڭ ۇلكەن ءوسىمى بايقالدى.