ەۋروپالىقتار سالاۋاتتى ءومىر سالتىن ۇستانبايدى

ەۋروپادا ءومىر ءسۇرۋ ۇزاقتىعىنىڭ ءوسۋ قارقىنى باياۋلادى. مۇنداي جاعداي 14 جىلدان بەرى جالعاسىپ كەلەدى. زەرتتەۋ جۇرگىزگەن بريتاندىق عالىمدار وسىلاي دەپ وتىر.

 كارى قۇرلىقتاعى دەموگرافيالىق وزگەرىسكە نە سەبەپ؟

ەۋروپالىقتاردىڭ ورتاشا ءومىر ءسۇرۋ ۇزاقتىعى 80 جاس شاماسىندا. 2011 -جىلدان بەرى ونىڭ ءوسۋ قارقىنى باياۋلاپ بارادى. مۇنداي جاعداي زەرتتەۋگە قاتىسقان 20 ەلدىڭ بارلىعىندا دەرلىك بايقالعان. اسىرەسە ۇلى بريتانيا مەن گەرمانياداعى احۋال قيىن. وعان تۇرعىنداردىڭ سالاۋاتتى ءومىر سالتىن ۇستانباۋى سەبەپ. ەۋروپالىقتار كەيىنگى جىلدارى از قوزعالىپ، دۇرىس تاماقتانباي، سەمىزدىككە ءجيى شالدىعاتىنىن بولعان.

سارا پرايس، انگليا ۇلتتىق دەنساۋلىق ساقتاۋ قىزمەتىنىڭ وكىلى:

- جۇرەك- قان تامىرلارى مەن ونكولوگيالىق اۋرۋلار سالدارىنان ءومىر ءسۇرۋ ۇزاقتىعىنىڭ ءوسۋ قارقىنى باياۋلادى. بۇل دۇرىس تاماقتانباۋ، فيزيكالىق بەلسەندىلىكتىڭ تومەندەۋى جانە سەمىزدىك سەكىلدى تۇپكى سەبەپتەردى جويۋ ءۇشىن ناقتى قادام قاجەت ەكەنىن كورسەتىپ وتىر. سوندىقتان الداعى 10 جىلعا ارنالعان ۇلتتىق دەنساۋلىق ساقتاۋ جوسپارىنا مىندەتتى تۇردە وسى زەرتتەۋ ناتيجەلەرىن قوسامىز.

 زەرتتەۋگە قاتىسقان 20 ەلدىڭ ىشىندە تەك نورۆەگيادا عانا ءومىر ءسۇرۋ ۇزاقتىعىنىڭ وسكەنى بايقالعان. مۇندا تۇرعىنداردىڭ دۇرىس تاماقتانۋىنا كوپ كوڭىل بولىنەدى. كەرەك دەسەڭىز، قانتقا، تاتتىلەرگە جانە سۋسىندارعا سالىق سالىنادى. بۇدان بولەك، ءالى 13 كە كەلمەگەن بالالارعا زيان تاماقتى جارنامالاۋعا بولمايدى.

 ليندا گرانلۋند، نورۆەگيانىڭ قوعامدىق دەنساۋلىق ساقتاۋ سالاسىنىڭ مامانى:

- ءبىز دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىستارىن ءالى تولىقتاي ورىنداعانىمىز جوق. دەگەنمەن ونداعى قانتتى تۇتىنۋ مولشەرىن قىسقارتۋ بويىنشا ماقساتقا قول جەتكىزدىك. ماسەلەنى شەشۋ ءۇشىن ماماندار ەۋروپا ەلدەرىنىڭ باسشىلارىن ۇلتتىق دەنساۋلىق ساقتاۋ ساياساتىن قايتا قاراستىرۋعا، ەكولوگيالىق ونىمدەردىڭ جارناماسىن كوپتەپ كورسەتىپ، قايتا وڭدەلگەن ازىق- تۇلىكتى تاڭبالاۋعا شاقىرادى.

https://24.kz