ەۋروپالىق وداق سىرتقى ىستەر مينيسترلەرى ورتالىق ازياداعى ارىپتەستەرىمەن كەزدەسەدى
استانا. KAZINFORM - ە و سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى كايا كاللاس بۇگىن ەۋروپا استاناسىندا ە و سىرتقى ىستەر مينيسترلەرى ورتالىق ازيا، وڭتۇستىك كاۆكاز جانە قارا تەڭىز ايماعىنداعى ارىپتەستەرىمەن كەزدەسەتىنىن مالىمدەدى.
ونىڭ ايتۋىنشا، كەزدەسۋ قارا تەڭىز قاۋىپسىزدىگى جانە بايلانىستاردى ودان ءارى دامىتۋ ماسەلەلەرىنە ارنالادى.
- بارلىق ەل ەنەرگەتيكالىق پورتفەلدەرىن، ساۋدا جولدارىن جانە جەتكىزۋ تىزبەكتەرىن ءارتاراپتاندىرۋعا ارەكەت ەتىپ كەلەدى. ءبىز بىرگە تاعى نە ىستەي الامىز؟ - دەپ اتاپ ءوتتى كاللاس مينيسترلەردىڭ قاتىسۋىن قۇپتاپ.
كەزدەسۋ ە و سىرتقى ىستەر كەڭەسىندە وتەدى، وعان ە و-عا مۇشە 27 مەملەكەتتىڭ سىرتقى ىستەر مينيسترلەرى قاتىسادى.
بۇگىن ورتالىق ازيا ەلدەرىنىڭ، سونىڭ ىشىندە قازاقستان، سونداي-اق وڭتۇستىك كاۆكاز، مولدوۆا، تۇركيا جانە ۋكراينانىڭ وكىلدەرى قاتىسادى دەپ جوسپارلانىپ وتىر. كەزدەسۋدە كولىك جانە لوگيستيكالىق بايلانىستاردى، ەنەرگەتيكالىق قاۋىپسىزدىكتى جانە ترانسكاسپي حالىقارالىق كولىك باعىتى اياسىنداعى سيفرلىق دالىزدەردى نىعايتۋعا باسا نازار اۋدارىلادى.
سىرتقى ىستەر كەڭەسىنىڭ كۇن تارتىبىندە سيريا مەن تاياۋ شىعىستاعى جاعدايدى، سونداي-اق ۋكرايناعا قاتىستى ماسەلەلەردى تالقىلاۋ دا بار.
كايا كاللاس ە و سيريامەن قارىم-قاتىناسىن باسقا جەرورتا تەڭىزى ەلدەرىمەن قارىم-قاتىناسىنا ۇقساس سەرىكتەستىك دەڭگەيىنە كوتەرۋدى كوزدەپ وتىرعانىن اتاپ ءوتتى.