ەۋروپالىق ساراپشىلار قازاقستانداعى تۇرمىستىق زورلىق- زومبىلىقتى قىلمىس دەپ سانايتىن زاڭنىڭ قابىلدانۋىن قولدادى

  استانا. – 18-ساۋىردە ەۋروپالىق كەڭەستىڭ پارلامەنتتىك اسسامبلەياسى سايتىندا «قازاقستاننىڭ ادام قۇقىقتارى، دەموكراتيا جانە ەۋروپا كەڭەسىمەن ىنتىماقتاستىق سالاسىنداعى ىلگەرىلەۋى» اتتى جازباشا دەكلاراتسيا جاريالاندى.

وعان ءبىرىنشى بولىپ ۆەنگريا پارلامەنتشىسى، ەكپا- داعى ۇلتتىق دەلەگاتسيانىڭ باسشىسى جوۆت نەمەت قول قويعان. ج. نەمەت Kazinform اگەنتتىگىنىڭ تىلشىسىنە بەرگەن سۇحباتىندا ەك پ ا- نىڭ 22-مۇشەسى ەۋروپالىق كەڭەس پەن قازاقستان اراسىنداعى بايلانىستاردى دامىتۋدى جانە ق ر- داعى رەفورمالاردى قولدايتىنىن اتاپ ءوتتى.

«ەۋروپا كەڭەسى مەن قازاقستان اراسىنداعى قارىم-قاتىناستا جاڭا وزگەرىستەر بولىپ جاتىر. قازاقستان رەسپۋبليكاسىنداعى ساياسي رەفورمالاردىڭ دامۋىن اتاپ وتكىم كەلەدى جانە قازاقستاندىق ساياساتكەرلەردى ەۋروپا كەڭەسىمەن بايلانىستاردى تەرەڭدەتۋگە شاقىرامىن»، - دەدى ۆەنگريالىق پارلامەنتاري.

ستراسبۋرگتەگى ە ك پ ا- نىڭ فرانتسۋزدىق ساراپشىسى كارلا دۋات ەلىمىزدەگى وقيعالارعا توقتالدى.

«قازاقستاندا تۇرمىستىق زورلىق- زومبىلىقتى قىلمىستىق جاۋاپكەرشىلىككە تارتاتىن زاڭنىڭ قابىلدانۋى - دۇرىس شەشىم. بۇل تۋرالى قازاقستاندا بولىپ كەلگەن سەناتورلار جان- جاقتى حاباردار ەتتى. بۇل قازاقستان رەسپۋبليكاسى مەن ەۋروپا كەڭەسى اراسىنداعى ىنتىماقتاستىقتىڭ 20 جىلدىعىن ەسكەرەتىن ەرەكشە ءسات»، - دەدى ك. دۋات.

بەلگيانىڭ گەنت ۋنيۆەرسيتەتى دوكتورانتۋراسىنىڭ قىزمەتكەرى جانە ۇلى بريتانياداعى سەنت- ەندريۋس ۋنيۆەرسيتەتىنىڭ تاياۋ شىعىس، ورتالىق ازيا جانە كاۆكاز زەرتتەۋلەرى ينستيتۋتىنىڭ عىلىمي قىزمەتكەرى كارولينا كليۋچيەۆسكا NE Global باسىلىمىنا تۇرمىستىق زورلىق-زومبىلىقتى كريميناليزاتسيالاۋ ماڭىزدى قادام ەكەنىن ايتتى.

«وزگەرىستەر كامەلەتكە تولماعاندارعا جاسالعان زورلىق- زومبىلىق ءۇشىن جازانى كۇشەيتەدى. تۇزەتۋلەر سوڭعى بىرنەشە جىلدا قوعامدا كەڭىنەن تالقىلاندى. ولار سونداي- اق گەندەرلىك زورلىق-زومبىلىق تۋرالى قوعامدىق پىكىرتالاستار مەن نولدىك توزىمدىلىككە شاقىرۋ قايتا باستالعانىن ەسكەرە وتىرىپ، ماڭىزدى ساتتە ورىن الدى»، - دەدى ك. كليۋچيەۆسكا.

ساراپشى سونداي- اق «NE Global» - عا قازاقستانداعى جاڭا زاڭدار، ەڭ الدىمەن، ەۋرووداقتىڭ نەمەسە باسقا دا سىرتقى ويىنشىلاردىڭ ىقپالىنان ەمەس، ىشكى ديناميكاعا رەاكتسيادان تۋىنداعانىن ەسكە سالدى.

«الايدا زاڭداردىڭ ءىس جۇزىندە قالاي جۇزەگە اسىرىلاتىنى جانە قۇقىق قورعاۋ ورگاندارىنىڭ تۇرمىستىق زورلىق- زومبىلىق جاعدايلارىنا قانشالىقتى جاۋاپ بەرەتىنى ءالى بەلگىسىز. ويتكەنى ءدال وسى دەڭگەيدە زورلىق- زومبىلىق جاعدايلارى ءجيى ەسكەرىلمەيدى»، - دەپ ەسكەرتەدى ساراپشى.

ايتا كەتەيىك، 15-ساۋىردە پرەزيدەنت ايەل قۇقىعى مەن بالالاردىڭ قاۋىپسىزدىگىن قامتاماسىز ەتەتىن زاڭدارعا قول قويعان ەدى.