ەۋروپالىق كەڭەس €800 ميلليارد كولەمىندەگى قايتا قارۋلانۋ جوسپارىن ماقۇلدادى
استانا. KAZINFORM - بەيسەنبى كۇنى كەشكە بريۋسسەلدە ەۋروپالىق وداققا مۇشە 27 مەملەكەت باسشىلارىنىڭ توتەنشە ءسامميتى اياقتالدى، دەپ حابارلايدى Kazinform ءتىلشىسى.
شۇعىل تۇجىرىمداما ەۋروپا ءۇشىن وسى كەزەڭدەگى تاعدىرلى ماسەلەلەردى تالقىلاۋدى كوزدەدى - بۇل ۋكراينانىڭ قورعانىس قابىلەتىن نىعايتۋ جانە قولداۋ. ەكى تاقىرىپ تا بريۋسسەل ءۇشىن ا ق ش- تىڭ جاڭا باسشىلىعىنىڭ كيەۆكە اسكەري كومەك كورسەتۋدى جانە ۋكراينامەن بارلاۋ الماسۋدى توقتاتۋ تۋرالى شەشىمدەرىنەن كەيىن وزەكتى بولا ءتۇستى.
تالقىلاۋ ناتيجەسىندە ە و باسشىلارى قورعانىس قابىلەتىن نىعايتۋ جانە ۋكراينانى ودان ءارى قولداۋ بويىنشا بىرلەسكەن كومميۋنيكە شىعاردى. الايدا، ۆەنگريا سوڭعى قۇجاتقا قول قويۋدان باس تارتتى، ونىڭ پرەمەر- ءمينيسترى ۆيكتور وربان ە و- نىڭ جالپى ۇستانىمىنا كەلىسپەيتىندىگىن ءبىلدىردى.
- امەريكالىقتار ۋكراينانى قولداۋدى توقتاتتى. ەۋروپالىقتاردىڭ ەداۋىر بولىگى امەريكالىقتاردىڭ ورنىن باسقىسى كەلەدى. كەلىسىم جوق. پىكىرتالاس جالعاسادى، - دەپ جازدى ۆ. وربان Facebook الەۋمەتتىك جەلىسىندە.
بارلىق كوشباسشى وسى اپتانىڭ باسىندا ەۋروپالىق كوميسسيانىڭ باسشىسى ۋرسۋلا فون دەر ليايەن ۇسىنعان جانە كونتينەنتتى قايتا قارۋلاندىرۋعا باعىتتالعان بەس تارماقتى باستاما تۋرالى بلوكتىڭ ۇجىمدىق قورعانىسىن نىعايتۋ تۋرالى مالىمدەمەلەر جاسادى.
ەۋروكوميسسيا باسشىسىنىڭ باستاماسى «ReArm Europe» («ەۋروپانى قايتا قارۋلاندىرۋ» ) دەپ اتالادى. جوسپار 800 ميلليارد ەۋرو ءبولۋدى، ونىڭ ىشىندە ەو ەلدەرىنىڭ اسكەري الەۋەتىن نىعايتۋ ءۇشىن 150 ميلليارد ەۋرو نەسيە تارتۋدى كوزدەيدى. نەگىزگى اسپەكت ە و- عا مۇشە ەلدەر ە و- نىڭ بيۋدجەتتىك ءتارتىپ نورمالارىن بۇزعانى ءۇشىن ەۋروكوميسسيا تاراپىنان ايىپپۇل سالىنباي، قورعانىسقا قوسىمشا شىعىنداردى ءوز موينىنا الۋى ءۇشىن فيسكالدىق ەرەجەلەردى جەڭىلدەتۋ بولۋى ءتيىس.
ەۋرووداق سونداي-اق «قارىزدىڭ تۇراقتىلىعىن قامتاماسىز ەتە وتىرىپ، بارلىق مۇشە مەملەكەتتەردە ۇلتتىق دەڭگەيدە قورعانىسقا جۇمسالاتىن شىعىنداردى ەداۋىر ارتتىرۋعا ىقپال ەتۋ ءۇشىن» جاڭا قورلاردى بۇعاتتان شىعارۋدى تاپسىردى.
سونىمەن قاتار، ە و كوشباسشىلارى ەۋروپالىق كوميسسياعا «بارلىق مۇشە مەملەكەتتەرگە ۇسىنىلاتىن قوسىمشا مۇمكىندىكتەر مەن ىنتالاندىرۋلاردى قوسا العاندا، ە و دەڭگەيىندە قورعانىستى قارجىلاندىرۋدىڭ قوسىمشا كوزدەرىن ۇسىنۋدى» تاپسىردى.
سامميتكە ۋكراينا پرەزيدەنتى ۆلاديمير زەلەنسكي قاتىستى، ول فرانسيا، يتاليا جانە بەلگيا باسشىلارىمەن جەكە كەزدەسۋ وتكىزدى.
