رونالدۋ جانكۇيەرلەرىنەن كەشىرىم سۇراپ، ۇلتتىق قۇراماداعى مانسابىن اياقتامايتىنىن مالىمدەدى
استانا. KAZINFORM - ساۋد ارابياسىنىڭ «ءال-ناسر» كلۋبىنىڭ شابۋىلشىسى ءارى كاپيتانى، «التىن دوپتىڭ» بەس دۇركىن يەگەرى كريشتيانۋ رونالدۋ پورتۋگاليا ۇلتتىق قۇراماسىنان ءوز بەتىنشە كەتىپ قالعانى ءۇشىن كەشىرىم سۇرادى.
پورتۋگاليالىق فۋتبولشى بۇل تۋرالى Instagram پاراقشاسىندا مالىمدەدى.
- ماعان بەرىلگەن ۋادەنىڭ بۇدان ءارى دە بۇزىلعانىن كۇتپەي، ۇلتتىق قۇرامادان كەتۋگە شەشىم قابىلدادىم. ولار ءبىراۋىزدان مەنىڭ ورنىم ۇلتتىق قۇرامادا ەكەنىن ايتتى. 25 جىلعا جۋىق مانسابىمدا ەشقاشان قانداي ءدا بىر جاتتىقتىرۋشىنىڭ نەمەسە ۇلتتىق قۇرامانىڭ باپكەرىنىڭ تەحنيكالىق نە تاكتيكالىق شەشىمدەرىنە ارالاسقان ەمەسپىن،-دەپ جازدى رونالدۋ.
فۋتبولشى ۇلتتىق قۇراماداعى ارىپتەستەرى مەن جانكۇيەرلەرىنەن ءوز ارەكەتى ءۇشىن كەشىرىم سۇرادى.
- پورتۋگاليا حالقىنان كەشىرىم وتىنەمىن. الايدا ماعان بەرىلگەن ۋادەنىڭ ورىندالماۋى وسىنداي شەشىم قابىلداۋىما اسەر ەتتى. باپكەردىڭ ۋادەسىنە كوپ ادام كۋا، ولار مۇنى راستاي الادى. سوعان قاراماستان، مەن بۇلاي جاساماۋىم كەرەك ەدى. جاۋاپكەرشىلىك تەك مەنىڭ موينىمدا، - دەدى فۋتبولشى.
رونالدۋ حالىقارالىق مانسابىنىڭ تەك قوشتاسۋ ماتچىمەن اياقتالعانىن قالامايتىنىن دا ايتتى. ونىڭ سوزىنشە، مۇنداي كەزدەسۋلەر وتكىزۋگە ءالى ۋاقىتى بار. قازىر ول پورتۋگاليا قۇراماسىمەن بىرگە جارىستارعا قاتىسىپ، جەڭىسكە جەتۋدى جالعاستىرعىسى كەلەدى. سونداي-اق پورتۋگاليا فۋتبول فەدەراتسياسى تاراپىنان قانداي دا ءبىر جازا تاعايىندالسا، ونى قابىلداۋعا دايىن ەكەنىن مالىمدەدى.
- مەن بارلىق جانكۇيەرىمە، اسىرەسە بارلىق پورتۋگاليالىققا ۋادە بەرە الامىن. بىزدە ءبىر نەمەسە بىرنەشە قوشتاسۋ ماتچى بولادى. وعان ءالى ۋاقىت بار. سوندىقتان دەنساۋلىعىم جاقسى بولىپ، كلۋبىمدا ويناپ، گول سوعىپ جۇرسەم، ماعان تاعايىندالۋى مۇمكىن ديسكۆاليفيكاتسيادان كەيىن دە ۇلتتىق قۇراما ساپىندا ويناۋعا دايىنمىن. بۇعان دەيىنگى كۇندەردەگىدەي، ۇلتتىق قۇراما ءۇشىن ونەر كورسەتىپ، جەڭىسكە جەتۋ ءۇشىن ءاردايىم كوماندادان تابىلامىن، - دەپ اتاپ ءوتتى ول.
بۇعان دەيىن 41 جاستاعى رونالدۋ ۇلتتىق قۇرامانىڭ باس باپكەرى وتكىزگەن باسپا ءسوز ءماسليحاتىنان كەيىن جانە پورتۋگاليا فۋتبول فەدەراتسياسىنىڭ پرەزيدەنتىمەن سويلەسكەن سوڭ قۇرامانىڭ ساپىنان كەتۋ تۋرالى شەشىم قابىلداعانىن ايتقان بولاتىن. سونداي-اق ۋاقىتى كەلگەندە ۇلتتىق قۇرامادان كەتۋگە تۇرتكى بولعان سەبەپتەردىڭ اق-قاراسىن بۇكىل پورتۋگاليا حالقىنا ايتىپ بەرەتىنىن دە مالىمدەگەن ەدى.
