رونالدۋ مەن باس باپكەر اراسىنداعى كەلىسپەۋشىلىك

14-قاراشادا پورتۋگاليالىقتار ۇلتتار ليگاسى اياسىندا دانيانى قابىلدايدى، دەپ حابارلايدى Kursiv Media.

41 جاستاعى كريشتيانۋ رونالدۋ 5-قاراشادا پورتۋگاليا قۇراماسىنداعى مانسابىن اياقتايتىنىن رەسمي مالىمدەدى. وسىلايشا فۋتبول تاريحىنداعى ەڭ تانىمال ويىنشىلاردىڭ ءبىرىنىڭ ۇلتتىق قۇراماداعى 23 جىلدىق جولى اياقتالدى.

رونالدۋ الەۋمەتتىك جەلىدە جاريالاعان بەينەۇندەۋىندە پورتۋگاليا قۇراماسىنىڭ 7- ءنومىرلى جەيدەسىن كەلەسى بۋىنعا تابىستايتىن ۋاقىت كەلگەنىن ايتتى.

«بۇل وڭاي شەشىم بولعان جوق. ويتكەنى كەيبىر شەشىمدەر اقىلمەن عانا ەمەس، جۇرەكپەن دە قابىلدانادى»،-دەدى فۋتبولشى.

كريشتيانۋ رونالدۋ پورتۋگاليا قۇراماسى ساپىندا 234 ماتچ وتكىزىپ، 146 گول سوقتى. بۇل - ەرلەر اراسىنداعى حالىقارالىق فۋتبولدىڭ ەكى بىردەي الەمدىك رەكوردى.

ول ۇلتتىق قۇرامامەن بىرگە 2016-جىلى ەۋروپا چەمپيوناتىن، 2019-جانە 2025 -جىلدارى ۇلتتار ليگاسىن جەڭىپ الدى.

پورتۋگاليا قۇراماسىندا جاڭا كەزەڭ باستالادى

رونالدۋدىڭ كەتۋى پورتۋگاليا فۋتبولىنداعى جاڭا كەزەڭنىڭ باستالۋىن بىلدىرەدى. ۇزاق جىلدار بويى كوماندانىڭ كوشباسشىسى ءارى كاپيتانى بولعان ويىنشى ەندى ۇلتتىق قۇراما ساپىندا ونەر كورسەتپەيدى.

باس باپكەر جورجە جەزۋش ءۇشىن الداعى كەزدەسۋلەر كوماندانىڭ جاڭا قۇرامىن قالىپتاستىرۋعا مۇمكىندىك بولماق.

بيىلعى ۇلتتار ليگاسىندا پورتۋگاليا العاشقى ءتورت ماتچتىڭ بارلىعىندا جەڭىسكە جەتىپ، ءوز توبىندا ءبىرىنشى ورىندا تۇر. كوماندا شيرەك فينالعا جولدامانى دا مەرزىمىنەن بۇرىن قامتاماسىز ەتكەن.

14-قاراشادا پورتۋگاليا براگا قالاسىندا دانيامەن كەزدەسەدى. ال 17-قاراشادا ۋەلس قۇراماسىنا قارسى سىرت الاڭدا وينايدى.

رونالدۋ مەن باس باپكەر اراسىنداعى كەلىسپەۋشىلىك

رونالدۋدىڭ ۇلتتىق قۇرامادان كەتۋىنە دەيىن باس باپكەر جورجە جەزۋشپەن ارادا كەلىسپەۋشىلىك بولعانى حابارلانعان. قىركۇيەك ايىندا فۋتبولشى جاتتىقتىرۋشىنىڭ شەشىمىنە كوڭىلى تولماي، كوماندا ورنالاسقان لاگەردەن رۇقساتسىز كەتكەن. كەيىن ول باپكەردىڭ ورىندالماعان ۋادەلەرىن العا تارتقان.

جورجە جەزۋش ءوز كەزەگىندە رونالدۋمەن مۇنداي كەلىسىم بولماعانىن ايتىپ، فۋتبولشىنىڭ قۇراماعا قايتا ورالۋىنا قارسى ەمەس ەكەنىن مالىمدەگەن.

الايدا 5-قاراشادا كريشتيانۋ رونالدۋ ۇلتتىق قۇراماداعى مانسابىن ءبىرجولا اياقتايتىنىن جاريالادى. پورتۋگاليا فۋتبول فەدەراتسياسى اڭىز ويىنشىعا العىس ءبىلدىرىپ، ونىڭ ەل فۋتبولىنا قوسقان ۇلەسىن ەرەكشە اتاپ ءوتتى.

ايتا كەتەيىك، رونالدۋ كاسىبي فۋتبولدان تولىق كەتكەن جوق. ول ساۋد ارابياسىنىڭ «ءال- ناسر» كلۋبىندا ونەر كورسەتۋىن جالعاستىرادى.