ەۋروپادا قار جاۋدى
استانا. KAZINFORM - ورتالىق ەۋروپا مەن بالقاندا قار جاۋدى. بۇرىن بۇل ايماقتاردىڭ تۇرعىندارى ادەتتەن تىس ىستىق كوكتەمدى باستان وتكەرگەن ەدى. اۋا تەمپەراتۋراسى 30- گرادۋسقا جەتكەن بولاتىن، دەپ حابارلايدى Euronews.
ەۋروپاداعى اۋا رايى تاعى دا تاڭعالدىردى. اۋستريانىڭ كەي جەرلەرىندە سەيسەنبىدەن بەرى قار جاۋىپ جاتىر، دەمالىس كۇندەرى اۋا تەمپەراتۋراسى 30 گرادۋستان جوعارى بولعان. اتاپ ايتقاندا، كارينتياداعى پاكساتتەل اسۋى قار استىندا قالدى.
بىرنەشە كولىك اپاتى بولدى. كوپتەگەن جولدا جۇرگىزۋشىلەردەن ارنايى شىنجىرلار تاعۋ تالاپ ەتىلدى. توتەنشە جاعدايلار قىزمەتى قار باسقان اعاشتار جولدار مەن ەلەكتر جەلىلەرىنە قۇلاپ كەتەدى دەپ قاۋىپتەنىپ وتىر.
حورۆاتيانىڭ زاگورە قالاسىندا دا قار جاۋىپ، پەتروۆسكو، حۋم- نا* سۋتلي، پرەگرادا، دجۋرمانەتس، رادوبوي جانە ەسەنە ەلدى مەكەندەرىنىڭ ءبىر بولىگىن قار جامىلدى. ەلدىڭ كەي جەرلەرىندە قار ارالاس جاڭبىر جاۋدى. تۇرعىندار گۇلدەنگەن جەمىس اعاشتارىنا زيان تيگىزەتىن قاتقاق بولمايتىنىنا ۇمىتتەنىپ وتىر.
ەكى كۇندىك اپتاپ ىستىقتان كەيىن رۋمىنياداعى اۋا تەمپەراتۋراسى 20 گرادۋسقا دەرلىك كۇرت تومەندەدى. ەلدىڭ سولتۇستىك- باتىسىنداعى كلۋج- ناپوكا قالاسىنا ناعىز قىس كەلدى. ەگەر سەيسەنبىدە ءمۇنداعى تەرمومەتر باعاناسى 25 گرادۋس كورسەتسە، سارسەنبىدە 4 گرادۋس بولدى. كليماتولوگتاردىڭ پىكىرىنشە، اۋا رايىنىڭ مۇنداي قۇبىلۋى جاھاندىق جىلىنۋعا بايلانىستى بولىپ وتىر.
«جەر شارىنداعى ەكوجۇيەلەر مەن كليماتتىق جاعدايدىڭ قالاي وزگەرىپ جاتقانىن ءىس جۇزىندە كورۋگە بولادى. امال قانشا، سوعان ۇيرەنۋ كەرەك»، - دەدى جەرگىلىكتى تۇرعىنداردىڭ ءبىرى.
بوسنيا مەن گەرتسەگوۆينانىڭ تاۋلى ايماقتارى مەن ەل استاناسى سارايەۆو دا قار استىندا قالدى. بۇل رەتتە مۇنداعى اۋا تەمپەراتۋراسى بۇعان دەيىن شامامەن 30 گرادۋسقا جەتتى. بۇل - بالقانداعى كوكتەمگە ءتان ەمەس قۇبىلىس.
