ەۋروپادا دەموگرافيالىق داعدارىس: حالىق سانى كۇرت تومەندەيدى

استانا. KAZINFORM - ەۋروپادا حالىق سانى ازايىپ، تۇرعىندار قارتايىپ بارادى. Eurostat بولجامىنا سايكەس، 2025- 2100 -جىلدار ارالىعىندا ەۋرووداق حالقى 11,7 پايىزعا ازايادى. ياعني تۇرعىندار سانى 452 ميلليوننان 399 ميلليونعا دەيىن ازايىپ، شامامەن 53 ميلليون ادامعا كەميدى. بۇل ەسەپكە كوشى-قون دا ەنگىزىلگەن، دەپ جازدى Euronew.com.

الايدا بارلىق ەلدەردەگى جاعداي بىردەي ەمەس. كەيبىر مەملەكەتتەردە حالىق سانى وسەدى، ال باسقالارىندا ايتارلىقتاي تومەندەيدى.

ەڭ ۇلكەن تومەندەۋ قاي ەلدەردە بولادى؟

ەڭ قاتتى قۇلدىراۋ (30 پايىزدان استام) مىنا ەلدەردە كۇتىلەدى:

لاتۆيا (33,9 پايىز)، ليتۆا (33,4 پايىز)، پولشا (31,6 پايىز) جانە گرەكيا (30,1 پايىز). بۇل ەلدەر عاسىر سوڭىنا قاراي ءاربىر ءۇشىنشى تۇرعىنىن جوعالتۋى مۇمكىن.

20 پايىزدان استام تومەندەۋ مىنا ەلدەردە بولجانىپ وتىر:

بولگاريا، حورۆاتيا، سلوۆاكيا، رۋمىنيا، يتاليا جانە ۆەنگريا. بۇل شامامەن ءار ءتورتىنشى ادامنىڭ ازايۋىمەن تەڭ.

10- 20 پايىز ارالىعىندا قىسقارۋ:

پورتۋگاليا، ەستونيا، چەحيا، فينليانديا، سلوۆەنيا جانە گەرمانيا.

ال كەرىسىنشە، كەيبىر ەلدەردە حالىق سانى وسەتىنى بولجانعان. ماسەلەن، ليۋكسەمبۋرگ (36,4 پايىز)، يسلانديا (27,1 پايىز) جانە مالتا (26 پايىز) ءوسۋى مۇمكىن.

سونداي-اق شۆەيتساريا، يرلانديا، نورۆەگيا جانە شۆەتسيادا دا ءوسىم بولادى.

نەگە مۇنداي ايىرماشىلىق بار؟

ساراپشىلاردىڭ ايتۋىنشا، باستى سەبەپ - كوشى-قون. ۆەنسكي ينستيتۋت دەموگرافي وكىلى توماش سوبوتكاتىڭ پىكىرىنشە، بۇرىننان ميگرانتتار كوپ كەلەتىن ەلدەردە حالىق سانى وسەدى. ال تۋۋ دەڭگەيى تومەن ءارى ادامدار سىرتقا كوپ كوشەتىن ەلدەردە حالىق تەز ازايادى.

تاعى ءبىر ساراپشى انن گۋجون دا وسىنى راستايدى: حالىق سانىنىڭ وزگەرۋى نەگىزىنەن تۋۋ مەن ولىمنەن ەمەس، كوشى-قون تەڭگەرىمىنەن تاۋەلدى.

ەۋروپاداعى ەڭ ۇلكەن ەكونوميكاعا كەلسەك:

- يسپانيا حالقى ءسال وسەدى (+1,3 پايىز)

- فرانسيا ازداپ تومەندەيدى (-2,5 پايىز)

- گەرمانيا (-10,6 پايىز) جانە اسىرەسە يتاليا (-24 پايىز) ايتارلىقتاي قىسقارادى

بولاشاقتا يسپانيا يتاليانى باسىپ وزىپ، حالىق سانى بويىنشا ەۋروپادا ءۇشىنشى ورىنعا شىعۋى مۇمكىن.

تاعى ءبىر ماڭىزدى وزگەرىس - حالىقتىڭ قارتايۋى. 2100 -جىلعا قاراي:

- ءاربىر ءۇشىنشى ەۋروپالىق 65 جاستان اساتىن بولادى

- 85 جاستان اسقاندار ۇلەسى 3,2 پايىزدان 10,8 پايىزعا دەيىن وسەدى

- ال ەڭبەككە قابىلەتتى جاستاعى ادامدار (31- 65 جاس) ۇلەسى ازايادى.

قورىتىندىسىندا، ەۋروپادا حالىق سانى ازايىپ قانا قويماي، ونىڭ جاسى دا ايتارلىقتاي ۇلعايادى.