ەۋروپاعا ساياحات قىمباتتاۋى مۇمكىن: ۆيزالىق ەرەجە وزگەرمەك
استانا.قازاقپارات - شەنگەن ايماعىنا ساياحاتتاۋ بولاشاقتا قىمباتتاۋى مۇمكىن. ەۋروكوميسسيا شەنگەن ۆيزاسىنىڭ قازىرگى تولەمىنە قوسىمشا الىم ەنگىزۋ مۇمكىندىگىن قاراستىرىپ جاتىر.
ازىرگە بۇل - ەۋروپالىق وداقتىڭ ۆيزالىق كودەكسىن جاڭارتۋ اياسىندا تالقىلانىپ جاتقان ۇسىنىستاردىڭ ءبىرى. قوسىمشا الىمنىڭ ناقتى مولشەرى ازىرگە بەلگىسىز. ونى ەنگىزۋ تۋرالى تۇپكىلىكتى شەشىم دە قابىلدانعان جوق.
ەۋروكوميسسيا جاڭا ۆيزالىق ەرەجەلەر بويىنشا ۇسىنىستى 2027-جىلدىڭ ءبىرىنشى توقسانىندا تانىستىرۋدى جوسپارلاپ وتىر.
قوسىمشا الىم ەنگىزىلگەن جاعدايدا، ودان تۇسكەن قاراجات ە و-نىڭ ورتاق ۆيزالىق ساياساتىن دامىتۋعا باعىتتالۋى مۇمكىن.
سونىمەن قاتار، ە و ۆيزالىق راسىمدەردى سەنىمدى تۋريستەر مەن ىسكەرلىك ساپارعا شىعاتىن ازاماتتار ءۇشىن جەڭىلدەتۋدى جوسپارلاپ وتىر. اتاپ ايتقاندا، تەكسەرىلگەن كومپانيالاردىڭ قىزمەتكەرلەرىنە وتىنىشتەردى جەدەل قاراۋ، باسىم كەزەك بەرۋ نەمەسە قۇجاتتار سانىن ازايتۋ مۇمكىندىگى قاراستىرىلۋدا.
جاڭا ەرەجەلەر ۆيزالىق ساياساتتى قاۋىپسىزدىك، كوشى-قون جانە ە و-عا كىرمەيتىن ەلدەرمەن قارىم-قاتىناس ماسەلەلەرىمەن بايلانىستىرۋعا دا باعىتتالماق.
قازىرگى تاڭدا ەۋروكوميسسيا ازاماتتاردان، مەملەكەتتىك ورگانداردان، بيزنەس وكىلدەرى مەن ساياحاتشىلاردان جاڭا ەرەجەلەر بويىنشا ۇسىنىستار جيناپ جاتىر. ۆيزالىق كودەكستىڭ جاڭارتىلعان نۇسقاسىن ازىرلەۋ مەرزىمى وزگەرۋى مۇمكىن.
ايتا كەتەيىك، وسىعان دەيىن پرەزيدەنت قاسىم-جومارت توقايەۆ پەن ە و ليدەرلەرىنىڭ كەلىسسوزدەر قورىتىندىسى بويىنشا ۆيزالىق رەجيمدى جەڭىلدەتۋ ماسەلەلەرى تالقىلانعان.
Kursiv.Media
