ەۋروپاعا باعىت العان وزبەكستاندىق ۇشاقتار رەسەيدى اينالىپ ءوتىپ جاتىر

تاشكەنت. قازاقپارات - Uzbekistan Airways كومپانياسىنىڭ ۇشاقتارى 20-قاڭتاردان بەرى رەسەيدى اينالىپ ءوتىپ، ەۋروپاعا رەيس ورىنداپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

بۇل تۋرالى ب ا ق وكىلدەرىنىڭ قاتىسۋىمەن وتكەن باسپا ءسوز ءماسليحاتىندا Uzbekistan Airways ۇلتتىق كومپانياسىنىڭ ءتوراعاسى شۋحرات حۋدايكۋلوۆ ايتتى.

10-قاڭتاردا ەۋروپالىق اۆياتسيالىق قاۋىپسىزدىك اگەنتتىگى رەسەيدىڭ ماسكەۋ، سانكت-پەتەربۋرگ، سامارا جانە ەكاتەرينبۋرگ قالالارىنا رەيس جاساۋدى شەكتەۋ قاجەتتىگىن مالىمدەگەن بولاتىن.

- بۇرىن ءبىزدىڭ ەۋروپاعا باعىتتالعان بارلىق رەيستەر رەسەي ارقىلى وتەتىن. الايدا، 20-قاڭتاردان باستاپ ۇشۋ باعىتىن تولىق وزگەرتتىك. قازىر رەيستەر ازەربايجان مەن تۇركيا ارقىلى ورىندالىپ جاتىر. بۇل ءوز كەزەگىندە ۇشۋ ۋاقىتىنىڭ ۇزارۋىنا جانە قوسىمشا شىعىندارعا اكەلدى، - دەدى شۋحرات حۋدايكۋلوۆ.

ونىڭ ايتۋىنشا، رەيستى ورىنداۋداعى قيىندىقتارعا قاراماستان، Uzbekistan Airways بيلەت باعاسىن كوتەرمەگەن. شىعىندار ۇلتتىق كومپانيا ەسەبىنەن وتەلىپ جاتىر.

ايتا كەتەيىك، بىلتىر 25-جەلتوقساندا اقتاۋ ماڭىندا باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىراعان بولاتىن.

بورتتا 67 ادام، ونىڭ ىشىندە بەس ەكيپاج مۇشەسى بولعان. اپات سالدارىنان 38 جولاۋشى قازا تاۋىپ، 29 ادام امان قالدى.

قايعىلى جاعدايدان كەيىن قازاقستان، ازەربايجان جانە رەسەيدە قىلمىستىق ءىس قوزعالدى.