ەۋروپا چەمپيوناتىنا ىرىكتەۋ: فۋتبولدان قازاقستان جاستارى العاشقى جەڭىسىنە جەتتى

فۋتبولدان 21 جاسقا دەيىنگى قازاقستان جاستار قۇراماسى 2025 -جىلعى ەۋروپا چەمپيوناتىنا ىرىكتەۋ ساتىسىنىڭ ءتورتىنشى ويىنىندا مالتامەن كەزدەستى، دەپ حابارلايدى قازاقپارات.

قازاقستان ۆ توبىندا سىنعا ءتۇسىپ جاتىر. قارسىلاستارى - يسپانيا، ماجارستان، شوتلانديا، مالتا جانە بەلگيا قۇرامالارى.

سىرت الاڭدا وتكەن ماتچتا قازاقستاندىق جاستار الاڭ يەلەرىنە قارسى تەگەۋرىندە ويىن كورسەتتى.

اتالعان توپتا مالتا ءالسىز قۇرامانىڭ ءبىرى بولىپ وتىر. قازىرگە دەيىن ءتورت كەزدەسۋدىڭ بارلىعىندا قارسىلاسىنا ەسە جىبەردى.

بۇگىنگى ويىننىڭ ءبىرىنشى كەزەڭىندە قوس قۇرامانىڭ دا ەسەپ اشاتىن بىرنەشە مۇمكىندىگى بولعان ەدى. كەيبىر ساتتە ولارعا دالدىك جەتىسپەسە، ەندىگى ءبىر مەزەتتە قاقپاشى مەن قورعاۋشىلار ساۋاتتى ويىن كورسەتتى.

ەكىنشى كەزەڭدە قازاقستاندىق ايبار ابدۋللا 53-مينۋتتا ەسەپ اشسا، 72-مينۋتتا دامير قاسابولات باسىمدىقتى ارتتىرا ءتۇستى.

وسىلايشا قازاقستان فۋتبولشىلارى قۇرلىقتىق دودا ىرىكتەۋ ساتىسىنداعى العاشقى جەڭىسىنە قول جەتكىزدى. ەسەپ - 2:0.

ەسكە سالساق، ەل جاستارى بۇدان بۇرىن ءۇش ويىن وتكىزىپ، ماجارستانعا - 0:2، بەلگياعا - 0:1، يسپانياعا 0:4 ەسەبىمەن جول بەردى.

ەندى ق ر قۇراماسى الداعى ويىنىن 2024 -جىلدىڭ 21-ناۋرىزىندا سىرت الاڭدا شوتلاندياعا قارسى وتكىزەدى.