ەۋروپا ليگاسى: «توبىل» بۇگىن سلوۆاكيالىق «رۋجەمبەروك» كومانداسىمەن كەزدەسەدى

استانا. KAZINFORM - بۇگىن، 11-شىلدەدە قوستانايدىڭ «توبىلى» فۋتبولدان ەۋروپا ليگاسى ءبىرىنشى ىرىكتەۋ كەزەڭىندە سلوۆاكيانىڭ «رۋجەمبەروك» كومانداسىمەن كەزدەسەدى.

كەزدەسۋ ەلوردا ۋاقىتىمەن 22:00 دە باستالىپ، «Sport Plus Qazaqstan» جانە «ەل ارنا» تەلەارنالارىنان تىكەلەي ەفيردە كورسەتىلەدى.

«رۋجەمبەروك» سلوۆاكيا چەمپيوناتىندا 2005-2006-جىلعى ماۋسىمدا التىن مەدال الدى. سول جىلى ەل كۋبوگىن يەلەنسە، بىلتىر بۇل جەتىستىگىن تاعى ءبىر مارتە قايتالادى. «رۋجومبەروك» ەۋروكۋبوكتا جەتى رەت ويناعان. 2006-جىلى چەمپيوندار ليگاسىنىڭ جانە 2017-جىلى ەۋروپا ليگاسىنىڭ ءۇشىنشى ىرىكتەۋ كەزەڭىنە دەيىن جەتتى.

اتالعان كوماندا قۇرامىندا نەگىزىنەن سلوۆاكيالىق فۋتبولشىلار ويىن كورسەتەدى. ولاردىڭ قاتارىندا ساميۋەل لاۆرينچيك، مارتين حريەن جانە قاقپاشى توماس فريۋۆالد سەكىلدى تاجىريبەلى ويىنشىلار بار.

قورعانىس شەبىندە كەزىندە پورتۋگاليانىڭ «بەنفيكاسىنىڭ» نامىسىن قورعاعان مارتين حريەن جاسىل الاڭعا شىقسا، شابۋىلدا نەگىزىنەن شتەفان گەرەتسكە سەنىم ارتىلعان.

ەسكە سالساق، بۇدان بۇرىن چەمپيوندار ليگاسى ءبىرىنشى ىرىكتەۋ كەزەڭىندە «ورداباسى» مولدوۆالىق «پەتروكۋب» كومانداسىمەن تەڭ ءتۇستى.