ەۋروپا كوشباسشىلارى ۇلى بريتانياداعى سامميتتە قانداي كەلىسىمگە كەلدى

استانا. KAZINFORM - لوندوندا ۇلىبريتانيا پرەمەر- ءمينيسترى كير ستارمەر ۇيىمداستىرعان ەۋروپالىق كوشباسشىلار ءسامميتى مارەسىنە جەتتى، دەپ جازادى BBC.

ءسامميتتىڭ باستى ماقساتى - سوعىستى توقتاتۋ جوسپارىن ازىرلەۋ.

دەرەككە قاراعاندا، بۇل جوسپار كەيىننەن امەريكا قۇراما شتاتتارىمەن تالقىلانىپ، كەيىن بىرگە جۇزەگە اسىرىلماق.

كەزدەسۋگە قاتىسۋشىلار كەلەسى ءتورت قادامعا قاتىستى كەلىستى:

سوعىس ءجۇرىپ جاتقان كەزدە ۋكرايناعا اسكەري كومەك كورسەتۋدى جالعاستىرۋ جانە رەسەيگە ەكونوميكالىق قىسىمدى كۇشەيتۋ.
كەز كەلگەن تۇراقتى بەيبىتشىلىك ۋكراينانىڭ ەگەمەندىگى مەن قاۋىپسىزدىگىن قامتاماسىز ەتۋى كەرەك، ال ۋكراينا كەلىسسوزدەر ۇستەلىندە بولۋى ءتيىس.
ەگەر بەيبىت كەلىسىمگە قول جەتكىزىلسە، ەۋروپالىق كوشباسشىلار رەسەيدىڭ ۋكرايناعا بولاشاقتا كەز كەلگەن باسىپ كىرۋىنە جول بەرمەۋگە تىرىسادى.
ۋكراينانى قورعاۋ جانە ەلدەگى بەيبىتشىلىكتى قامتاماسىز ەتۋ ءۇشىن «قالاۋلىلار كواليتسياسى» قۇرىلادى.
لوندونداعى سامميت قورىتىندىسى بويىنشا وتكەن باسپا ءسوز ءماسليحاتىندا ۇلى بريتانيا پرەمەر- ءمينيسترى كوشباسشىلار وسى قارقىندى ساقتاۋ جانە ورتاق جوسپار بويىنشا جۇمىستى جالعاستىرۋ ءۇشىن جاقىن ارادا قايتا كەزدەسۋگە كەلىسكەنىن ايتتى.

- بۇگىن ءبىز تاريحتىڭ توعىسقان تۇسىندا تۇرمىز»، - دەدى ول. - قازىر بوس اڭگىمەنىڭ ۋاقىتى ەمەس، ءادىل جانە تۇراقتى بەيبىتشىلىككە قول جەتكىزۋ ءۇشىن جاڭا جوسپاردىڭ اينالاسىندا ارەكەت ەتۋ جانە بىرىگۋ ۋاقىتى كەلدى.