ەۋروپا عارىشتاعى قوقىستى جينايتىن اپپارات ۇشىرادى

استانا. KAZINFORM - ەۋروپالىق عارىش اگەنتتىگى وربيتاعا ارنايى اپپارات جىبەرىپ، جۇمىسىن اياقتاعان سپۋتنيكتەردى ۇستاپ، عارىشتان شىعارۋدى جوسپارلاپ وتىر.

«Samarkand — 2028» спутнигі ғарыш кеңістігіне шығарылады
Фото: uzcosmos.uz

بۇل تەحنولوگيانى ازىرلەۋگە 102 ميلليون ەۋرودان استام قارجى ءبولىندى، دەپ حابارلايدى BILD.

جوبانى گەرمانيانىڭ OHB كومپانياسى جەتەكشىلىك ەتەتىن حالىقارالىق كونسورتسيۋم ازىرلەيدى. ClearSpace-1 ميسسياسىن 2030-جىلى ۇشىرۋ جوسپارلانعان.

اپپاراتتىڭ العاشقى نىساناسى 2001-جىلى ۇشىرىلعان PROBA-1 سپۋتنيگى بولادى. عارىشتاعى قوقىستى جيناۋعا ارنالعان اپپارات وعان وزدىگىنەن جاقىنداپ، ءتورت روبوتتاندىرىلعان مانيپۋلياتورى ارقىلى ۇستاپ الادى. سودان كەيىن ەكى اپپاراتتى دا جەر اتموسفەراسىنا باعىتتايدى. اتموسفەراعا ەنگەن كەزدە ولار جانىپ كەتۋى ءتيىس.

مۇنداي تەحنولوگياعا دەگەن قاجەتتىلىك وربيتاداعى قوقىس كولەمىنىڭ ارتۋىنا بايلانىستى كۇشەيىپ كەلەدى. ەۋروپالىق عارىش اگەنتتىگىنىڭ مالىمەتىنشە، جەر وربيتاسىندا 47 مىڭنان استام نىسان باقىلانادى. ال كولەمى 1-10 سانتيمەتر بولاتىن ۇساق سىنىقتاردىڭ سانى 1,5 ميلليونعا جەتۋى مۇمكىن.

قوزعالىس جىلدامدىعى جوعارى بولعاندىقتان، ءتىپتى شاعىن سىنىقتاردىڭ ءوزى جۇمىس ىستەپ تۇرعان سپۋتنيكتەرگە زاقىم كەلتىرەدى.

ەسكە سالايىق، بۇعان دەيىن SpaceX كومپانياسى Starship كەمەسىن عارىشتان ورالعان سوڭ العاش رەت مەحانيكالىق مانيپۋلياتورلارمەن ۇستاپ الدى.