ەۋروپا ارحيۆتەرىنەن قازاق حاندىعىنا قاتىستى جادىگەرلەر تابىلدى

استانا. قازاقپارات - عالىمداردىڭ مالىمدەۋىنشە جادىگەرلەر شىڭعىس حاننان تاراعان ۇلىستىڭ تاريحى مەن قازاق حاندىعىنىڭ قۇرىلۋ كەزەڭى تۋرالى تىڭ دەرەككە جول اشادى.

ۇلى بريتانيا، فرانسيا مەن شۆەيتساريا ارحيۆىنەن قازاق حاندىعىنىڭ قالىپتاسۋ تاريحىنا قاتىستى جادىگەرلەر تابىلدى، - دەپ حابارلايدى  24kz.

ارنايى ەكسپەديتسيانىڭ ناتيجەسى تۋرالى بۇگىن جوشى ۇلىسىنىڭ 800 جىلدىعىنا ارنالعان عىلىمي-پراكتيكالىق كونفەرەنسيادا ايتىلدى.

عالىمداردىڭ مالىمدەۋىنشە جادىگەرلەر شىڭعىس حاننان تاراعان ۇلىستىڭ تاريحى مەن قازاق حاندىعىنىڭ قۇرىلۋ كەزەڭى تۋرالى تىڭ دەرەككە جول اشادى. ەۋروپا ەلدەرىنىڭ مۇراعاتتارىندا ەسكى كارتا، قول-جازبالار، التىن وردا مونەتالارى جانە عىلىمي قولدانىسقا، العاش رەت ەنگىزىلگەلى وتىرعان دۇنيەلەر بار. شىعىس تانۋشىلار، كۇنشىعىس ەلىنىڭ مۇراعاتى دا ماڭىزدى دەيدى. سەبەبى تۇركولوگيا عىلىمى، جاپونيادا جاقسى دامىعان.

- ءبىز قازىر وسى ارتەفاكتەردىڭ كوشىرمەلەرىن الۋ جونىندە سويلەسىپ جاتىرمىز. مىسالى، حاننىڭ كيىز ۇيىنە ىلىنەتىن بارقىتتان جاسالعان ادەمى تۇسكىلەم بار. ال مىناۋ جاسىل ءتۇستى اتلاس تۇسكىلەم جاۋىنگەرلەردىڭ كيىز ۇيىندە تۇرادى. مۇنى مەن اسكەري بوز ءۇي دەيمىن. بۇل جەردە قازاق حاندىعىنىڭ قاۋىپسىزدىگىنە بايلانىستى ماسەلەلەر تالقىلانىپ وتىرعان، - دەپ ءتۇسىندىردى ر. ب. سۇلەيمەنوۆ اتىنداعى شىعىس تانۋ ينستيتۋتى جانىنداعى تاريحي ماتەريالداردى زەرتتەۋ ورتالىعىنىڭ ديرەكتورى مەرۋەرت ابۋسەيىتوۆا.

- تۇركولوگيا عىلىمى جاقسى دامىعان، وركەندەگەن ەلدىڭ ءبىرى - جاپونيا. ءبىز ەندى الداعى جىلداردا وسى جاپونياداعى تۇركولوگيا، تۇركولوگيالىق دەرەكتەر، وسى قازاق حاندىعىنىڭ تاريحىنا، ودان بەرى قازىرگى ورتا ازياعا قاتىستى دا زەرتتەۋلەردى الىپ كەلۋ باعىتىندا ارنايى عىلىمي جوبا قاراستىرىپ وتىرمىز، - دەدى ر. ب. سۇلەيمەنوۆ اتىنداعى شىعىستانۋ ينستيتۋتىنىڭ باس ديرەكتورى دۇكەن ءماسىمحان ۇلى.