ەرتىس وزەنىندە 24-ساۋىردەن كەمەلەر جۇزە باستايدى
پاۆلودار. KAZINFORM - قازىرگى ۋاقىتتا پاۆلودار وبلىسى بويىنشا كولىكتىك باقىلاۋ ينسپەكتسياسىنىڭ ەسەبىندە 102 كەمە تىركەلگەن.
ەرتىس وزەنىندە 24-ساۋىردەن ناۆيگاتسيالىق كەزەڭ اشىلادى. بۇل - جۇك جانە جولاۋشىلار تاسيتىن سۋ كولىكتەرىنىڭ ەلىمىزدەگى ەڭ ۇزىن سۋ ارتەرياسىندا جۇزۋىنە رەسمي رۇقسات بەرىلەدى دەگەن ءسوز. ناۆيگاتسيالىق كەزەڭ وزەننىڭ جوعارعى جاعىندا - مايتۇبەك - پاۆلودار قالاسى باعىتىندا جانە تومەنگى بولىگى - پاۆلودار - تومەنگى الەكسەيەۆسكيي (ر ف شەكاراسى) باعىتىندا جۇمىس ىستەيدى.
- وزەن ۇستىندە جۇك جانە جولاۋشىلار تاسىمالىن ۇيىمداستىراتىن كەمەلەر ءبىزدىڭ ينسپەكتسيادا رەسمي تىركەلۋى كەرەك. قازىرگى ۋاقىتتا ءبىزدىڭ ۇيىمنىڭ ەسەبىندە 102 سۋ كولىگى تىركەلگەن. ونىڭ 49 ى وزدىگىنەن جۇرەتىن كولىكتەر بولسا، وزگەسى وزدىگىنەن جۇرمەيتىن، ياعني بارجالار. بۇلاردىڭ ىشىندە 2 تەپلوحود قانا جولاۋشىلار ءۇشىن جابدىقتالعان، انىعىن ايتقاندا وزەن ۇستىندەگى سەرۋەنگە ارنالعان. وزگەسى جۇك تاسىمالىندا پايدالانىلادى. سىيىمدىلىعى 1000 توننالىق بارجالار پاۆلودار پورتىنان شىعىپ رەسەيدىڭ ومبى قالاسىنا جۇك تاسيدى. نەگىزگى اپاراتىن تاۋارلارى - وزەن قۇمى مەن قيىرشىق تاس. ال قايتاردا كەسىلگەن اعاش تۇرلەرىن جەتكىزەدى. بارجالار ومبىعا باعىت العاندا اعىس بويىمەن جۇزەتىندىكتەن 5 تاۋلىكتەي ۋاقىتىن جۇمسايدى. ال پاۆلودارعا ورالعاندا اعىسقا قارسى بولعاندىقتان ۇزاقتاۋ ءجۇزىپ كەلەدى، - دەپ ءتۇسىندىردى پاۆلودار وبلىسى بويىنشا كولىكتىك باقىلاۋ ينسپەكتسياسىنىڭ باس مامانى ەرنۇر ەسلاۋ.
سۋدا جۇزەتىن كولىكتەردىڭ سالماعى 200 كيلوگرامنان جانە قوزعالتقىشىنىڭ كولەمى 10 اتتىڭ كۇشىنەن اسسا، يەسى تىركەۋگە قويۋعا مىندەتتى. ۇلكەن كەمەلەردەن بولەك، تىركەۋگە قويىلعان 1540 شاعىن كولەمدى كەمە بار. ىشكى سۋ جولدارى ارقىلى جۇك جانە جولاۋشىلار تاسىمالدايتىن وزەن كولىكتەرىنىڭ قىزمەتكەرلەرى ۋاقىت سايىن بىلىكتىلىگى مەن دەڭگەيىن ارتتىرىپ وتىرۋى كەرەك. مىسالى، كەمە كاپيتانى بەس جىلدا ءبىر مارتە اتتەستاتتاۋدان وتەدى. ال ونىڭ كومەكشىلەرى مەن مەحانيكتەرگە جانە ت. ب. ماماندارعا ءوز دەڭگەيىن ارتتىرۋ ءۇشىن ديپلومداۋ جۇيەسى قاراستىرىلعان.
وبلىستا كەمە كاپيتاندارىنىڭ جەتىسپەۋشىلىگى ماسەلەسى بار. سەمەيدە كاپيتانداردى وقىتىپ شىعارعانىمەن، ولاردىڭ ءبىلىمى ورتا كاسىبي دەپ ەسەپتەلەدى. سوندىقتان ەل ازاماتتارى تولىققاندى كاپيتان بولۋ ءۇشىن رەسەيدە وقىپ كەلۋگە ءماجبۇر. ينسپەكتورلار قازىرگى ۋاقىتتا سۋ كولىكتەرىنىڭ ءتيىستى قۇجاتتارىن، ونداعى كاپيتاندار مەن كومەكشىلەردىڭ، مەحانيكتەردىڭ بىلىكتىلىكتەرى تۋرالى ديپلوم-سەرتيفيكاتتارىن تەكسەرىپ جاتىر.
- وڭىردەگى سۋ جولدارىنىڭ جاعدايى «قازاقستان سۋ جولدارى» ۇيىمىنىڭ جەرگىلىكتى فيليالىنىڭ ماماندارى ارقىلى تەكسەرىلىپ جاتىر. اتالعان ۇيىم كەمەلەرگە ارنايى سۋ جولدارى كورسەتىلگەن كارتالار بەرەدى. جۇك نەمەسە جولاۋشىلار تاسىعان ۋاقىتتا كەز كەلگەن كەمە سول باعىتتى ۇستانىپ، بارلىق بەلگىلەرگە باعىنۋى كەرەك. مىسالى، پاۆلودار قالاسىنىڭ ماڭىندا زاكىر تاستاۋعا بولمايتىن ورىندار بار. ال كەي جەرلەردەگى سۋ جولدارىنىڭ ەنى تارلاۋ كەلەدى، - دەپ قوستى ينسپەكتسيا وكىلى.
كەمەلەر قايراڭداپ قالماۋى ءۇشىن بەكىتىلگەن ەرەجەلەردى ەسكەرىپ، سۋ جولدارىنىڭ كارتاسىن نەگىزگە الادى. ال بەلگىلەردىڭ تالاپقا ساي بولۋىنا «قازاقستان سۋ جولدارى» جاۋاپ بەرەدى. ينسپەكتسيا ءوز تاراپىنان بەلگىلەردىڭ جاعدايى مەن دۇرىس ورنالاسۋىن تەكسەرەدى. كەمەلەردى دە ءجيى تەكسەرىپ تۇرادى. اسىرەسە، جاز ۋاقىتىندا قۇقىق قورعاۋ ورگاندارىنىڭ قىزمەتكەرلەرى رەيد ۇيىمداستىرادى.
«شاعىن كولەمدى سۋ كولىكتەرىندەگى ادامدار كوبىنە قۇتقارۋ جەلەتكەسىن كيمەيدى. ال ۇلكەن كەمەلەر مەن بارجالاردا ارنايى جۋرنالداردى تولتىرۋ، اتتەستاتتاۋدان ۋاقتىلى وتپەۋ سياقتى جۇيەلى كەمشىلىكتەر كەزدەسىپ جاتادى. كەمشىلىككە جول بەرگەن تۇلعالارعا ايىپپۇل سالىنادى. كەيدە رەسەيلىك كەمەلەر مەن بارجالار پاۆلودارداعى پورتقا كەلىپ، جۇك تۇسىرەدى. ولار شەكاراداعى بەكەتتە جانە پورتتا تەكسەرۋدەن وتەدى. بۇعان قوسا سوڭعى جىلدارى سەمەيدەن ءبىر بارجا كەلىپ ءجۇر»، - دەيدى ە. ەسلاۋ.
اتاپ وتەرلىگى، پاۆلودار قالاسىنداعى جالعىز كەمە جوندەۋ زاۋىتىن الدەبىر كاسىپكەر ساتىپ الىپ، كاسىپورىندى كەڭەيتۋدى جوسپارلاپ وتىر.
بۇعان دەيىن ەرتىس وزەنىندەگى سۋ كولىكتەرى تەحنيكالىق بايقاۋدان قالاي وتەتىنى تۋرالى جازعانبىز.
