«ەرتىس ورمانى» بۇلان مەن ەلىكتىڭ قىسقى ازىعىن قامداپ جاتىر
پاۆلودار. KAZINFORM - «ەرتىس ورمانىنىڭ» قىزمەتكەرلەرى ورمان جانۋارلارى ءۇشىن قىسقى ازىق قورىن قامداپ جاتىر. رەزەرۆات اۋماعىندا قىستىڭ كۇنى 61 ارنايى ازىقتاندىرۋ الاڭى جۇمىس ىستەيدى.
الدا قاقاعان قىس كەلە جاتىر. جەر بەتىن اق مامىق كورپە جاپقان مەزگىلدە دە «ەرتىس ورمانى» مەملەكەتتىك ورمان تابيعي رەزەرۆاتىندا قاۋىرت جۇمىس تىنشىمايدى. قىس قاھارىنا ءمىنىپ، ومبى قار تۇسكەندە شالداي جانە بەسقاراعاي فيليالدارىنداعى قىزمەتكەرلەر جانۋارلار الەمىن براكونەرلەردەن قورعاۋ، جابايى اڭداردى تىركەۋ مەن ولاردىڭ كوشىپ-قونۋ مونيتورينگىن جۇرگىزەدى. بۇل ۋاقىتتا تۇياقتى جانۋارلار ءۇشىن قار استىنان ازىق تاۋىپ جەۋ قيىنعا سوعاتىنى ءمالىم. وسىنى ەسكەرگەن جەرگىلىكتى اڭشىلىقتانۋشى ماماندار ورمان اراسىن مەكەندەيتىن بۇلان، ەلىك سياقتى سۇتقورەكتىلەرگە ازىق ورىندارىن ۇيىمداستىرادى.
ورمانشىلار تىلىندە بۇل بيوتەحنيكالىق ءىس- شارا دەپ اتالادى. رەزەرۆاتتىڭ اڭشىلىقتانۋشىسى قايىرجان ادىلبايەۆتىڭ ايتۋىنشا، ورماندى مەكەندەگەن جانۋارلارعا قىسقى ازىق قورى جۇيەلى تۇردە ازىرلەنەدى. اڭشىلىق تانۋشىلار جابايى جانۋارلار ءۇشىن بيىل 25 توننا ءشوپ، 3000 دانا بۇتاق بۋمالارىن، 600 كيلوگرامم تۇز دايىنداپ جاتىر.
- قىسقى كەزەڭدە جانۋارلارعا ازىق جەتكىزۋ - رەزەرۆاتتاعى ماڭىزدى ەكولوگيالىق ءىس-شارالاردىڭ ءبىرى. بۇل جۇمىس ارنايى جوسپارعا سايكەس، قاتاڭ تارتىپپەن جانە جۇيەلى تۇردە اتقارىلادى. رەزەرۆات اۋماعىندا 61 ارنايى ازىقتاندىرۋ الاڭى بار. قىسقى ۋاقىتتا ءشوپ، تۇز، ازىقتىق بۇتاق بۋمالارى بەلگىلەنگەن ورىندارعا جەتكىزىلەدى. اڭشىلىق تانۋشىلار مەن مەملەكەتتىك ينسپەكتورلار الاڭداردى ۇنەمى باقىلاپ وتىرادى. ەگەر ازىق كولەمى ازايسا، دەر كەزىندە قوسىمشا جەتكىزىلەدى، - دەيدى ول.
قوزعالىس قيىنداعان جاعدايدا جانۋارلار جۇرەتىن سوقپاق جولدار انىقتالىپ، سول ماڭداعى اعاشتارعا ازىق ىلىنەدى. بۇل ءتاسىل، اسىرەسە ەلىك، بۇعى، قويان سەكىلدى تۇياقتى اڭدار ءۇشىن ءتيىمدى.
اتاپ وتەرلىگى، قازىرگى ۋاقىتتا «ەرتىس ورمانى» اۋماعىندا سۇتقورەكتىلەردىڭ 21 ءتۇرى، قۇستىڭ 90، باۋىرىمەن جورعالاۋشىلاردىڭ 3 جانە 32 جاندىك ءتۇرى تىركەلگەن. مۇندا قىزىل كىتاپقا ەنگەن ورمان سۋسارى مەكەندەيدى. سوڭعى ساناق قورىتىندىسى ورمان سۋسارىنىڭ 101 داراعى تىركەلگەن.
ەسكە سالا كەتەيىك، «ەرتىس ورمانىندا» سىلەۋسىننىڭ تولدەرى كوزگە ءتۇستى.
