ەرتىس-بايان ءوڭىرىنىڭ پوليتسەيلەرى جوعالعان 24 ادامدى ىزدەپ تاپتى

پاۆلودار. KAZINFORM - پاۆلودارلىق پوليتسەيلەر جىل باسىنان ءىز-ءتۇسسىز جوعالعان 24 ادامدى ىزدەپ تاپتى. ولاردىڭ بارلىعى ۇيلەرىنە قايتارىلدى.

وڭىرلىك پوليتسيا دەپارتامەنتى كريمينالدىق پوليتسيا ىزدەۋ ءبولىمىنىڭ باستىعى قۋاندىق قاسىموۆتىڭ ايتۋىنشا، جوعالعان ادامنىڭ تۋىستارى ارىزدى جەدەل بەرگەن جاعدايدا ونى تابۋ دا مەيلىنشە جەڭىلدەي تۇسەدى. جىل باسىنان بەرى پاۆلودار وبلىسىنىڭ پوليتسيا قىزمەتكەرلەرى جوعالعان 24 ادامنىڭ ورنالاسقان جەرىن انىقتاپ، ۇيىنە قايتارعان.

ماسەلەن، بيىلعى 24-شىلدە كۇنى پوليتسياعا ۇلىنىڭ جوعالىپ كەتكەنى تۋرالى ارىزبەن اناسى جۇگىنگەن. ول ەكى كۇن بۇرىن 48 جاستاعى ۇلى ۇيدەن كەتىپ قالىپ، ءالى ورالماعانىن ءتۇسىندىردى. ءوز بەتىمەن ىزدەۋ ناتيجە بەرمەگەن سوڭ اناسى ءتارتىپ ساقشىلارىنان كومەك سۇراعان. جوعالعان ادامدى ىزدەۋگە پوليتسيانىڭ جەكە قۇرامى مەن وزگە دە كۇشتەر، ەرىكتىلەر تارتىلدى.

- ىزدەستىرۋ ءىس-شارالارى بارىسىندا 31-شىلدە كۇنى پوليتسەيلەر رەسەي فەدەراتسياسىنىڭ بارناۋل قالاسىندا حابار-وشارسىز كەتكەن ازاماتتى تاپتى. بەلگىلى بولعانداي، تۋىستارىمەن جانجالدان كەيىن ەر ادام ۇيدەن كەتىپ قالعان. ءسويتىپ 10 كۇن بويى بايلانىسقا شىقپاعان، - دەيدى قۋاندىق قاسىموۆ.

ەسكە سالا كەتەيىك، پاۆلودارلىق پوليتسەيلەر جۇرتتى الداپ كەلگەن پاتەر الاياعىن قولعا ءتۇسىردى.

اۆتور
مۇرات اياعان