ەرتىس- بايان ءوڭىرىن 21 مىڭنان استام كيىك جاعالاپ ءجۇر

پاۆلودار. KAZINFORM - تابيعات قورعاۋ مەكەمەلەرىنىڭ قىزمەتكەرلەرى پاۆلودار وبلىسىنىڭ اۋماعىندا 21 مىڭنان استام كيىك بارىن انىقتادى. ماماندار جەرگىلىكتى شارۋاشىلىقتارعا اقبوكەندەردى ۇركىتۋ بارىسىندا زاڭسىز ءىس-ارەكەتتەردى قولدانباۋدى ەسكەرتىپ وتىر.

پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ مەملەكەتتىك ينسپەكتورلارى جانە «پو وحوتزووپروم» مەملەكەتتىك كاسىپورنىنىڭ باياناۋىل تىرەك پۋنكتىنىڭ قىزمەتكەرلەرى باياناۋىل، ماي، ەكىباستۇز، اقسۋ اۋماقتارىندا اقبوكەندەر مەن ارقارلاردى قورعاۋ بويىنشا بىرلەسكەن پروفيلاكتيكالىق ءىس-شارالار جۇرگىزدى.

«الدىن الۋ ءىس-شارالارىنىڭ قورىتىندىسى بويىنشا تابيعاتتى قورعاۋ زاڭناماسىن بۇزۋشىلىقتار انىقتالعان جوق. وڭىردە 21 مىڭنان استام اقبوكەن كەزدەستى»، - دەپ حابارلادى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنان.

شارۋا قوجالىقتارى كيىكتەردىڭ ەگىس القاپتارى مەن جايىلىمعا ءتۇسىپ كەتپەۋى ءۇشىن ۇركىتۋ امالدارىن قولداناتىنى بەلگىلى. ماماندار بۇل رەتتە زاڭسىز شارالار قولدانباۋ تۋرالى ءتۇسىندىرۋ جۇمىستارىن جۇرگىزدى.

ەسكە سالا كەتەيىك، اۋىل شارۋاشىلىعى ءمينيسترى كيىك سانىن رەتتەۋگە قاتىستى پىكىر بىلدىرگەن بولاتىن. 

«كيىك سانى ارتىپ كەلەدى. قالاي بولعاندا دا، ونى رەتتەۋ كەرەك دەپ ويلايمىن. ولاردى اتۋدىڭ قاجەتى جوق، بۇل تۇرعىدا كيىكتى اۋلاپ ۇستاۋدى ۇيىمداستىرعان ءجون. ەت كومبيناتتارىمىز دايىن، ستاندارتتار ازىرلەندى، ياعني جۇمىستى جۇزەگە اسىرا الامىز. مەن كيىكتى اتۋ جايىندا ەشتەڭە ايتا المايمىن. ءبىز تورلارمەن اۋلاۋ تۋرالى ايتىپ وتىرمىز»، - دەدى ا. ساپاروۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، الداعى ۋاقىتتا ەگىستىكتەرگە كيىكتەردى وتكىزبەيتىن ارنايى قورشاۋلار ورناتۋ ماسەلەسى تالقىلانباق.

«قازىر كيىكتەر كەلتىرگەن زياندى انىقتايتىن ادىستەمە ءالى ازىرلەنگەن جوق. ول ازىرلەنسە دە، جەڭىلدىكتى نەسيە مەن سۋبسيديالاۋ بويىنشا سۇراقتار بار، ياعني بيۋدجەت شەكسىز ەمەس. سوندىقتان بۇل تۇرعىدا ويلانۋىمىز كەرەك. بىرەر اپتادان كەيىن ءبىزدىڭ ۆيتسە-ءمينيسترىمىز جانە ەكولوگيا مينيسترلىگىنىڭ وكىلى باتىس قازاقستانعا بارادى. سوندا قورشاۋ تورلارىن نەمەسە باسقا دا قورعاۋ ءىس-شارالارىن سۋبسيديالاۋ تاقىرىبىن تالقىلايمىز»، - دەدى مينيستر.

اۆتور
مۇرات اياعان