ەرتەڭگى كۇنى ەل دامۋىنا جۇمىس ىستەيتىن ازاماتتاردىڭ قالىپتاسۋىنا بىلىكتى پەداگوگتەردىڭ ءتالىمى اۋاداي قاجەت - دۇيسەنوۆا

тамара
فوتو: ق ر ۇكىمەتى

الماتى. KAZINFORM - الماتى قالاسىنا جۇمىس ساپارى بارىسىندا ق ر پرەمەر-ءمينيسترىنىڭ ورىنباسارى تامارا دۇيسەنوۆا قازاق ۇلتتىق قىزدار پەداگوگيكالىق ۋنيۆەرسيتەتىنىڭ قىزمەتىمەن تانىستى.

بۇگىندە ۇستازدار ۇستاحاناسى سانالاتىن وقۋ ورنىندا 5 ينستيتۋت، 24 كافەدرا اياسىندا 9 مىڭداي ستۋدەنت ءبىلىم الادى.

پەداگوگيكالىق ءبىلىم بەرۋدى كۇشەيتۋ ماقساتىندا دۇنيەجۇزىلىك بانكتىڭ قولداۋىمەن ەرتە جاستاعى جانە ەرەكشە قاجەتتىلىگى بار بالالارمەن جۇمىس ىستەۋگە ۇيرەتۋگە مۇمكىندىك بەرەتىن ديداكتيكالىق، ادىستەمەلىك جابدىقتارى بار ينكليۋزيا كابينەتتەرى ازىرلەندى.

ايتا كەتەيىك، «ەرتە جاستاعى بالالاردى دامىتۋ جانە وتباسىن زەرتتەۋ ورتالىعى» ەلىمىزدە العاش رەت اشىلىپ وتىر. سونداي-اق ماماندار مەكتەپكە دەيىنگى ۇيىمداردىڭ پەداگوگتەرىنە ادىستەمەلىك كومەك كورسەتۋدە.

кабинет
فوتو: ق ر ۇكىمەتى

ۆيتسە-پرەمەر بۇل باستاماعا وڭ باعا بەرىپ، بالالارمەن جۇمىس ىستەيتىن بولاشاق ماماندارعا بۇل تاپتىرماس مۇمكىندىك ەكەنىن اتاپ ءوتتى.

ۋنيۆەرسيتەتكە تيەسىلى 3 وقۋ كورپۋسى 5 مىڭ ورىنعا شاقتالعان. سوندىقتان ينفراقۇرىلىمدى كەڭەيتۋ ماسەلەسى وزەكتى بولىپ وتىر.

بيىل وقۋ ورنى اۋدانى 12 مىڭ شارشى مەتردەن اساتىن جاڭا عيماراتتى يەمدەنىپ وتىر، وندا گۋمانيتارلىق جانە جاراتىلىستانۋ عىلىمدارى، فيزيكا، ماتەماتيكا جانە تسيفرلىق تەحنولوگيالار ينستيتۋتتارى جۇمىس ىستەيتىن بولادى.

تامارا دۇيسەنوۆا ۋنيۆەرسيتەتتىڭ پروفەسسورلىق-وقىتۋشىلىق قۇرامىمەن كەزدەسىپ، وندا سالانىڭ وزەكتى ماسەلەلەرى تالقىلاندى. ءبىلىم بەرۋ جۇيەسىن ودان ءارى دامىتۋ مىندەتتەرىن ىسكە اسىرۋداعى مۇعالىمدەردىڭ رولىنە ەرەكشە نازار اۋدارىلدى.

«بىزدە جىل سايىن 400 مىڭ بالا دۇنيەگە كەلەدى. ەسەپكە سۇيەنسەك، 2030 -جىلدان كەيىن ەڭبەك نارىعىندا 2003 -جىلدان بەرى دۇنيەگە كەلگەندەردىڭ ۇلەسى باسىم بولادى. سوندىقتان ەرتەڭگى كۇنى ەلىمىزدىڭ دامۋىنا جۇمىس ىستەيتىن ازاماتتاردىڭ قالىپتاسۋىنا بىلىكتى پەداگوگتەردىڭ ءتالىمى اۋاداي قاجەت. بۇل - ەگەمەندىكتىڭ ساقتالۋىنا كەپىل بولاتىن فاكتور»، - دەپ اتاپ ءوتتى تامارا دۇيسەنوۆا.

қызпу
فوتو: ق ر ۇكىمەتى

 

بيىل قىزدار پەداگوگيكالىق ۋنيۆەرسيتەتىنىڭ قۇرىلعانىنا 80 جىل تولماق.

ۇستازدار ۇستاحاناسى اتانعان ىرگەلى وقۋ ورنىنىڭ بۇل بەلەسىن ەل كولەمىندە اتاپ ءوتۋ جوسپارلانعان. تامارا دۇيسەنوۆا وسى باستامانى قولدايتىنىن جەتكىزدى.

بۇل رەتتە ۇيىمداستىرىلاتىن شارالار پەداگوگيكا سالاسىنىڭ وسى جىلدار اراسىندا قانداي وزگەرىستەرگە تاپ بولعانى، بۇگىنگىنىڭ ۇستازى قانداي بولۋى كەرەك ەكەنىنە ءمان بەرەتىن تانىمدىق سيپاتتا ءوتۋى كەرەكتىگىنە توقتالدى.

سوڭعى جاڭالىقتار