ەرتەڭ ەلىمىزدە اۋە رەيستەرى ءبىر ساعاتقا ەرتە ۇشادى

استانا. KAZINFORM - ەلىمىز ەرتەڭنەن باستاپ ءبىرىڭعاي ۋاقىت بەلدەۋىنە كوشەتىندىگىنە بايلانىستى پويىز جانە ۇشاق جولاۋشىلارىنا حابارلاندىرۋ جاسالدى.

2024 -جىلعى اقپاننىڭ 29 نان ناۋرىزدىڭ 1 نە قاراعان ءتۇنى ساعات 00:00-دە ەلىمىز ءبىرىڭعاي ۋاقىت بەلدەۋىنە كوشەدى.

وسىعان وراي، «سامۇرىق-قازىنا» ۇلتتىق ءال-اۋقات قورىنا قاراستى قازاقستان تەمىر جولى، «Air Astana»  «Qazaq Air» كومپانيالارى جولاۋشىلاردى اقپاراتتاندىرۋ جۇمىستارىن جالعاستىرۋدا.

«جولاۋشىلار ساعاتتى ءبىرىڭعاي ۋاقىت بەلدەۋىنە سايكەس اۋىستىرۋدى ۇمىتپاعانى ابزال. پويىزدار بيلەتتە كورسەتىلگەن ۋاقىتقا ساي كەلەدى جانە جونەلتىلەدى. 1-ناۋرىز ساعات 00:01 دەن (استانا ۋاقىتى بويىنشا) باستالاتىن اۋە رەيستەرى بيلەتتە كورسەتىلگەن ۋاقىتتان 1 ساعات بۇرىن ورىندالادى»، - دەلىنگەن قور تاراتقان اقپاراتتا.

سونداي-اق، حابارلامادا اۋەجايلاردىڭ Call-ورتالىقتارى ارقىلى ۇشۋ كەستەسىن ناقتىلاۋ قاجەتتىگى ايتىلعان (SMS جانە پوشتاعا حابارلامالار جىبەرىلەدى).

 

اۆتور
داۋلەت ىزتىلەۋ