ەرتەڭ «ۇلى دالا جورىعى» حالىقارالىق مارافون-بايگەسى باستالادى

الماتى. KAZINFORM - ەرتەڭ الماتى وبلىسىندا حالىقارالىق «ۇلى دالا جورىعى» مارافون-بايگەسى باستالادى. بەس كۇنگە سوزىلاتىن جورىق جەڭىستىڭ 80 جىلدىعىنا ارنايى ۇيىمداستىرىلىپ جاتىر.

- بۇل شارا جەڭىستىڭ 80 جىلدىعىنا ارنالىپ وتىر. وزدەرىڭىز بىلەسىزدەر، بۇل سوعىسقا قازاقستاننان 1,2 ميلليوننان اسا ادام كەتكەن. ونىڭ 600 مىڭعا جۋىعى ورالماعان. بىزدە ۇلى وتان سوعىسىنىڭ ىزعارى تيمەگەن وتباسى جوق دەسە بولادى. سول سەبەپتى V حالىقارالىق «ۇلى دالا جورىعى» مارافون-بايگەسىن وسى ايتۋلى كۇنگە ارناپ وتىرمىز، - دەيدى رەسپۋبليكالىق Joryq ات سپورتى فەدەراتسياسىنىڭ پرەزيدەنتى.

باقىتجان تۇرلىبەكوۆ «ۇلى دالا جورىعىنىڭ» نەگىزگى ماقساتىن ءتۇسىندىردى.

- «ۇلى دالا جورىعى» - الەمدەگى ەڭ مىقتى جىلقى تۇقىمىن انىقتايتىن دالالىق لابوراتوريا دەسەك تە بولادى. جالپى تۇلپار - بۇل قازاقتىڭ رۋحى. ال «ۇلى دالا جورىعى» - قازاقتىڭ جادىنا سىڭگەن رۋحتى ءتىرىلتۋدىڭ بىرەگەي جولى دەپ ايتسام، قاتەلەسپەيمىن. ءبىز قونايەۆ قالاسىنان 10-مامىر كۇنى تاڭعى 7 دە جولعا شىعامىز. ودان كەيىن باقاناس ارقىلى، ىلە وزەنىن جاعالاي وتىرىپ، 500 شاقىرىمنان كەيىن قايتىپ قونايەۆ قالاسىنا كەلەمىز، - دەيدى ول.

بيىلعى جورىققا 20 دان اسا كوماندا قاتىسۋى مۇمكىن. ءتىپتى شەتەلدىك قۇرامالاردىڭ ءبىرازى مارافون باستالاتىن اۋماققا جەتىپ تە ۇلگەرىپتى.

- بيىلعى جورىققا 20 دان اسا كوماندا كۇتىپ وتىرمىز. شەتەلدەن 6 كوماندا كەلىپ جەتتى. ولار - وڭتۇستىك افريكا، ماجارستان، يران، رەسەي، قىرعىزستان ەلدەرىنەن كەلگەن. ەندى تۇركيا مەن رەسەيدەن تاعى 2 كوماندانى كۇتىپ وتىرمىز. موڭعوليادان كەلەتىن قاتىسۋشىلارىمىز قۇجات ماسەلەسىنە بايلانىستى شەكارادان وتە الماي قالدى. ال قازاقستاننان كەمى 13 كوماندا قاتىسادى دەپ جوسپارلانعان، - دەيدى باقىتجان تۇرلىبەكوۆ.

رەسپۋبليكالىق Joryq ات سپورتى فەدەراتسياسىنىڭ پرەزيدەنتى «ۇلى دالا جورىعى» بايگەسىنە قاتىسۋعا نيەتتى ازاماتتار قانداي تالاپتارعا ساي بولۋ كەرەكتىگىن ايتتى.

- ەڭ باستىسى، سپورتشىلاردىڭ جاسى 18 دەن اسقان بولۋى كەرەك. مەديتسينالىق انىقتامالارى، 5 كۇنگە ساقتاندىرۋ ءپوليسى بولۋى قاجەت. سوسىن شاباندوزدىڭ سالماعى بارىنشا جەڭىل بولعانى ابزال. بۇل - ءار كوماندانىڭ ءوزىنىڭ مۇددەسى ءۇشىن، - دەيدى ۇيىمداستىرۋشى.

باقىتجان تۇرلىبەكوۆ مۇنداي جارىستار اراب مەملەكەتتەرىندە دە ۇيىمداستىرىلاتىنىن ايتادى. ءبىر ەرەكشەلىگى - وندا شاباندوزدار جالعىز ءوزى 160 شاقىرىم ارالىقتا جارىسادى ەكەن.

- «ۇلى دالا جورىعى» - بۇل كوماندالىق سپورت ءتۇرى. وزگە مەملەكەتتەردە جالعىز اتپەن 160 شاقىرىمدى باعىندىرادى. ال وزدەرىڭىز بىلەتىندەي، «ۇلى دالا جورىعى» بايگەسىندە شاباندوزدار 2022-جىلى - 1200 شاقىرىم، 2023-جىلى - 1300 شاقىرىم ارالىعىندا سىنعا ءتۇستى. بۇل - كوماندامەن ۇزاق قاشىقتىققا شاباتىن الەمدەگى جالعىز ات سپورت ءتۇرى دەسەك بولادى، - دەيدى ول.

فەدەراتسيا پرەزيدەنتى بۇعان دەيىن 1300 شاقىرىمعا سوزىلعان جارىس جولىنىڭ بيىل نەلىكتەن 500 شاقىرىمعا قىسقارعانىن ءتۇسىندىردى.

- 1946-جىلى ۇلى وتان سوعىسىنان كەيىن تۇرىكمەنستان اۋماعىندا وسىنداي جارىس وتكىزىلگەن. ول جەردە جالعىز ات كۇنىنە 100 شاقىرىمنان ءجۇرىپ، 5 كۇندە 500 شاقىرىمدى باعىندىرۋى كەرەك. ول كەزدەگى ەسەپ بويىنشا 1-ورىندى اقىلتەكە جىلقىسى العان. ول جارىس جولىن 62 ساعات 10 مينۋتتا شاۋىپ وتكەن. بۇل - تاريحي فاكت. ال بىزدە بىلتىر بۇل ارالىقتى 28 ساعاتقا تولمايتىن ۋاقىتتا ءوتتى. سوندىقتان ءبىز حالىقارالىق دەڭگەيدەگى قۇرامالار كوپتەپ قاتىسۋى ءۇشىن 1300 دەن 500 ك م- گە تۇسىردىك. ءبىز قاشىقتىقتى ۇزارتۋىمىزعا دا بولادى. قازاقستاندىق كوماندالار ونداي ۇزاق قاشىقتىققا دايىن. ءبىراق ءبىزدىڭ ماقساتىمىز - شەتەلدىك كوماندالاردى تارتۋ، - دەيدى باقىتجان تۇرلىبەكوۆ.

بيىلعى دودادا جەڭىسكە جەتكەن كومانداعا 100 مىڭ ا ق ش دوللارى سىيعا بەرىلمەك.

- كوماندا جەڭىسكە جەتتى دەپ ەسەپتەلۋى ءۇشىن 5 اتتىڭ كەمى 3 ەۋى مارەگە جەتۋى ءتيىس. جالپى قۇرامانىڭ 5 اتى تولىقتاي مەجەگە جەتسە، 100 مىڭ دوللار ۇتىپ الادى. 2-ورىنعا - 60 مىڭ دوللار. 3-ورىنعا - 40 مىڭ دوللار. جۇلدەگەرلەر رەگلامەنتكە ساي، ات سانىنا بايلانىستى انىقتالادى، - دەيدى فەدەراتسيا پرەزيدەنتى.

ەستەرىڭىزدە بولسا، جورىقتىڭ العاشقى جىلدارى قازاقتىڭ اداي مەن قوستاناي جىلقىلارى جوعارى ناتيجە كورسەتكەن ەدى.

- 2022-جىلدىڭ جەڭىمپازى - اداي جىلقىسى. مەملەكەت باسشىسى 2022-جىلى قاراشا ايىندا اداي جىلقىسىن ۇلتتىق برەند دەپ جاريالاعان ەدى. 2023-جىلى قوستاناي جىلقىسى ۇلكەن ناتيجە كورسەتتى. بىلتىر بارىنشا ءادىل بولۋعا تىرىستىق. بۇل جولى رەسەيدەن كەلگەن «كاباردين» بالقار كومانداسى 1-ورىن الدى. ولار جىلقى زاۋىتىنىڭ ارالاسقان اتتارىمەن كەلدى. ولاردى 30 جىلدان استام تاجىريبەسى بار ادامدار دايىندايدى. ال بىزدە مۇنداي ۇزاق جارىستار سوڭعى 5-10 جىلدا عانا قولعا الىنا باستادى. ال «ۇلى دالا جورىعىنىڭ» باستالعانىنا 3-اق جىل بولدى، - دەيدى جورىق ۇيىمداستىرۋشىسى.

وسىعان دەيىن تۇرىكمەنستاندا اقالتەكە جىلقىلارىنىڭ جارىسى باستالعانى تۋرالى جازدىق.