ەرتەڭ دجەي لو كونسەرتىنە بيلەتتەر ساتىلا باستايدى
استانا. KAZINFORM - امەريكالىق اكتريسا جانە ءانشى دجەننيفەر لوپەستىڭ استانادا وتەتىن كونسەرتىنە ەرتەڭ بيلەتتەر ساتىلىمعا شىعادى. بۇل تۋرالى «استانا كونسەرت» كومپانياسىنىڭ پروديۋسەرى مالىك حاسەنوۆ ايتتى.
- سوڭعى ءۇش كۇندە وتە ءجيى قويىلعان ساۋالداردىڭ ءبىرى بيلەتتەر ساتىلىمىنىڭ قاشان باستالاتىندىعىنا قاتىستى بولدى. رەسمي بيلەتتەر ساتىلىمىنىڭ باستالۋى ەكسكليۋزيۆ تۇردە FreedomTicketon بيلەت وپەراتورىندا جۇزەگە اسىرىلاتىنىن مالىمدەمەكپىن. ول 11-ءساۋىر كۇنى ساعات 11:00 دە باستالادى. ءبىز بيلەت ساتىپ العىسى كەلەتىن كورەرمەندەردىڭ لەگى قالىڭ بولادى دەپ كۇتىپ وتىرمىز. بيلەتتەردى جاپپاي ساتىپ الۋ، الىپساتارلىق بولماۋى ءۇشىن الەمدىك تاجىريبە نەگىزىندەگى جۇيە قولدانىلادى. باستاپقىدا ۆاۋچەر ساتىلادى. ال بىرەگەي QR كودتىڭ ءوزى كونسەرتكە ءۇش كۇن قالعان كەزدە بەرىلەدى، - دەدى ول ورتالىق كوممۋنيكاتسيالار قىزمەتىندەگى بريفينگتە.
ونىڭ اتاپ وتۋىنشە، بۇل بالاما الاڭداردا بيلەتتەردىڭ 2,3 ەسە قىمباتقا ساتىلىمعا شىعارىلماۋى ءۇشىن جاسالادى. ءبىر ادام تەك 4 بيلەت قانا ساتىپ الا الادى.
- بۇل بيلەتكە قاتىستى الاياقتىقتى بولدىرماۋعا مۇمكىندىك بەرەدى دەپ ويلايمىز، - دەدى مالىك حاسەنوۆ.
بۇعان دەيىن 1-تامىزدا «استانا ارەنا» ستاديونىندا الەمگە ايگىلى ءانشى دجەننيفەر لوپەستىڭ كونسەرتى وتەتىندىگىن جازعان ەدىك.
ەلورداداعى كونسەرت الەمدىك جۇلدىزدىڭ Up All Night تۋرنەسى اياسىندا وتپەك. الەمدىك تۋر 1-شىلدەدە باستالىپ، 3-تامىزعا دەيىن جالعاسادى. ول الەمنىڭ 17 قالاسىن قامتيدى، سونىڭ ىشىندە: انتاليا مەن ىستانبۇل، مادريد پەن بارسەلونا، بۋداپەشت، ۆارشاۆا، بۋحارەست، ءابۋ-دابي قالالارى بار.
