ەرتەڭ اتىراۋعا دروندار گۋمانيتارلىق جۇكتى جەتكىزەدى

 استانا. KAZINFORM - بۇگىن قازاقستانعا اۆتونومدى دروندار جەتكىزىلدى، ەرتەڭنەن باستاپ ولاردىڭ كومەگىمەن سۋ باسقان وڭىرلەرگە زاتتار مەن تاۋارلار جىبەرىلمەك.

بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ رەسمي وكىلى البينا اتەن ءمالىم ەتتى.

«امەريكالىق ستارتاپ ARC Drones نەگىزىن قالاۋشىلار الىبەك ەلتاي جانە اسەل تۇرسىن ەلىمىزدەگى سۋ تاسقىنىمەن كۇرەستە كومەككە اۆتونومدى درونداردى ۇسىندى. دروندار مەديتسينالىق قاجەتتىلىكتەردى، گۋمانيتارلىق كومەكتى، ازىق- تۇلىك جانە باسقا دا قاجەتتى تاۋارلاردى شالعاي ايماقتارعا جەتكىزەدى. قازاقستانعا دروندار بۇگىن اكەلىنەدى، ال ەرتەڭ توتەنشە جاعدايلار مينيسترلىگىمەن بىرلەسە اتىراۋ قالاسىندا جۇكتى جەتكىزۋدى جوسپارلاپ وتىر»، - دەدى البينا اتەن ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

رەسمي وكىلدىڭ مالىمدەۋىنشە، Astana Hub سۋ تاسقىنىن باسقارۋ بويىنشا 30 دان استام يننوۆاتسيالىق شەشىمدەردى جيناقتاپ، توتەنشە جاعدايلار مينيسترلىگىنە قاراۋعا ۇسىندى.

ەسكە سالا كەتەيىك، سۋ تاسقىنىنا ۇشىراعان وڭىرلەرگە گۋمانيتارلىق كومەكتى دروندار ارقىلى جەتكىزىلەتىنى تۋرالى حابارلاعان ەدىك.