رەسەيدەگى تۋرنيردە 7 قازاقستاندىق بوكسشى كەلەسى كەزەڭگە ءوتتى

استانا. KAZINFORM - حاباروۆسك قالاسىندا (رەسەي) ءوتىپ جاتقان كونستانتين كوروتكوۆتى ەسكە الۋعا ارنالعان حالىقارالىق تۋرنيردىڭ ءۇشىنشى جارىس كۇنىندە قازاقستان قۇراماسىنىڭ ساپىنداعى 9 بوكسشىنىڭ 7 ەۋى جارىستى جالعاستىرۋعا مۇمكىندىك الدى.

ەل قۇراماسىنىڭ اتىنان سىنعا تۇسكەن مۇحاممەدسابىر بازارباي ۇلى (67 كەلى) بەلارۋستىك دانيل تيتكونى ايقىن باسىمدىقپەن جەڭسە، ساعىندىق توعامباي (92 كەلى) رەسەيلىك ەگور پلوتسىندى 5:0 ەسەبىمەن قاپى قالدىردى. 60 كەلىدە بەيبارىس جەكسەن موڭعوليالىق گونبولد دارينباۋفقا 2:3 ەسەبىمەن ەسە جىبەردى.

ال ايەلدەر قۇراماسىنان گۇلنار تۇراپباي (50 كەلى) كۋبالىق ستەرلين دەليدى، ايدانا زابىنبەكوۆا (57 كەلى) اناستاسيا پاۆلوۆانى، ريمما ۆولوسەنكو (60 كەلى) موڭعوليالىق نامۋل مونكحوردى، ارۋجان جاڭابايەۆا (66 كەلى) رەسەيلىك ناتاليا سوكولوۆانى، ۇلدانا تاۋباي (66 كەلى) رەسەيلىك اننا گۋداروۆانى جەڭىپ، كەلەسى كەزەڭگە جولداما الدى.

وكىنىشكە قاراي 54 كەلىدە سىنعا تۇسكەن انەل ساقىش سولتۇستىك كورەيادان كەلگەن چجون حۋانعا 1:4 ەسەبىمەن ەسە جىبەردى.

ايتا كەتەيىك، حالىقارالىق تۋرنير بيىل ون التىنشى رەت ۇيىمداستىرىلىپ وتىر. بايراقتى باسەكە 20-ساۋىرگە دەيىن جالعاسادى.

بۇعان دەيىن رەسەيدەگى تۋرنيردە 9 قازاقستاندىق بوكسشى شارشى الاڭعا شىعاتىنىن جازعان ەدىك.