رەسەيدەگى سۋ قويمالارىنان كوپ سۋ جىبەرىلىپ جاتىر – ب ق و اكىمى تۇرعىندارعا ۇندەۋ جولدادى

ورال. KAZINFORM - باتىس قازاقستان وبلىسىنىڭ اكىمى ناريمان تورەعاليەۆ ءوڭىر تۇرعىندارىنا سۋ تاسقىنىنا قاتىستى قالىپتاسقان جاعداي بويىنشا ۇندەۋ جولدادى.

وندا ءوڭىر باسشىسى وبلىستا سۋ تاسقىنى قاۋپى ءالى سەيىلمەگەنىن اتاپ كورسەتتى.

«قۇرمەتتى باتىسقازاقستاندىقتار! تاسقىن سۋدىڭ سالدارىنان ءوڭىرىمىزدىڭ 5 اۋدانىندا جانە ورال قالاسىندا بىرنەشە تۇرعىن ۇيلەردى سۋ باسقان بولاتىن. بۇدان بولەك، ورال قالاسى ماڭىنداعى ساياجايلارعا دا سۋ كىردى. جالپى وبلىس بويىنشا 7 مىڭعا جۋىق ادام قاۋىپسىز جەرگە كوشىرىلدى، ونىڭ 3 مىڭنان استامى - بالالار. ەۆاكۋاتسيالىق پۋنكتتەردە قاجەتتى جاعدايلار جاسالىپ جاتىر. سۋ تاسقىنىنان زارداپ شەككەندەرگە مىڭداعان ەرىكتى كومەك كورسەتىپ جاتىر. تۇرعىندارعا ازىق-تۇلىك، ءدارى-دارمەك پەن كيىم-كەشەكتەر جەتكىزىلۋدە. كەزەكشىلىكتەر ۇيىمداستىرىلىپ، وقۋشى بالالارعا وقۋ پروتسەستەرى ونلاين فورماتتا ءوتىپ جاتىر. ءبىز ءوز تاراپىمىزدان تۇرعىنداردىڭ قاجەتتىلىكتەرىن ەسكەرىپ، بارلىق قاجەتتى جاعدايلاردى جاسايتىن بولامىز»، - دەدى ن. تورەعاليەۆ.

اكىمنىڭ ايتۋىنشا، رەسەيدىڭ كورشىلەس ساراتوۆ جانە ورىنبور وبلىستارىنداعى سۋ قويمالارىنان كوپ مولشەردە سۋ جىبەرىلىپ جاتىر. بۇل 30 جىل بۇرىن بولعان جاعدايدان دا كۇردەلى. اتاپ ايتقاندا، ساراتوۆ وبلىسىنداعى پريۋزەن سۋ قويماسىنان قاراوزەنگە سەكۋندىنا 431 تەكشەمەتر سۋ ءتۇسىپ جاتىر.

قازىرگى ۋاقىتتا سۋ تاسقىنىنىڭ ەكىنشى كەزەڭى باستالدى. كەشە رەسەيدىڭ ورسك قالاسىندا دامبى بۇزىلىپ، ەلدى مەكەندەر مەن تۇرعىن ۇيلەر زارداپ شەكتى. بۇل باتىس قازاقستان وبلىسىنا دا قاۋىپ ءتوندىرۋى مۇمكىن. ويتكەنى ورىنبوردىڭ يريكلا سۋ قويماسىنان سەكۋندىنا 2170 تەكشە مەتر سۋ جىبەرىلىپ جاتىر. بۇل سۋلار جاقىن ۋاقىتتا جايىق وزەنى ارقىلى ءوتىپ، كاسپيگە بەت الادى.

بۇگىن جايىقتاعى سۋ دەڭگەيى 7 مەترگە جۋىق كوتەرىلدى. بۇل قاۋىپتى مولشەرگە جاقىنداي ءتۇستى. وسىلايشا، وزەن سۋى ارناسىنان تاسىپ، ورالداعى 1-شى، 2-شى، 3-شى ساياجايلارعا سۋ كىرىپ جاتىر. سوندىقتان قالا تۇرعىندارىنىڭ تۇسىنىستىك تانىتۋ سۇرالادى.

سونداي-اق، رەسەيدىڭ ەلەك اۋدانىنىڭ تۇسىندا وزەن سۋلارىنىڭ قاۋىپتى دەڭگەيى 890 س م بولسا، قازىرگى ۋاقىتتا 855 سانتيمەترگە جەتتى. ءبىرىنشىشى، ەكىنشى، ءۇشىنشى ساياجاي تۇرعىندارى قالا اكىمدىگى بەكىتكەن ەۆاكۋاتسيالىق پۋنكتتەرگە نەمەسە وزدەرى قالاعان قاۋىپسىز جەرلەرگە كوشۋى ءتيىس.

«بۇگىن مەملەكەت باسشىسى قازاقستان حالقىنا سۋ تاسقىنى جاعدايى بويىنشا ۇندەۋ جاريالاپ، اپاتتان زارداپ شەككەن ءار تۇرعىن كومەكسىز قالمايتىنىن اتاپ ءوتتى. سوندىقتان ءبىز ءۇشىن جەرلەستەرىمىزدىڭ قاۋىپسىزدىگى ءبىرىنشى ورىندا دەگەن بولاتىن. ءبىز سۋ تاسقىنى باستالعاننان بەرى تاسقىننىڭ الدىن الۋ باعىتىنداعى جۇمىستاردى كۇشەيتىلگەن رەجيمدە اتقارۋدامىز. قالاعا جاقىن جايىق وزەنىنىڭ كوتەرىلۋىنە بايلانىستى، ونىڭ ىرگەسىن بەكىتىپ، قاپشىقتارمەن قۇم توسەپ جانە باسقا ساقتىق شارالارىن ىسكە اسىرىپ جاتىرمىز. وسىنداي قيىن ۋاقىتتا وبلىس جۇرتشىلىعى تابيعي اپاتتان زارداپ شەككەن جەرلەستەرىمىزگە جان-جاقتى قولداۋ كورسەتىپ، اۋىزبىرشىلىك تانىتىپ جاتىر. قازىرگى سۋ تاسقىنى بولعان ەلدى مەكەن تۇرعىندارىنا ءوڭىر كاسىپكەرلەرى، قوعامدىق بىرلەستىكتەر، بيۋدجەتتىك مەكەمەلەر، ەرىكتىلەر جانە قاراپايىم وبلىس تۇرعىندارى قولۇشىن سوزۋدا. توتەنشە جاعداي، كوممۋنالدىق قىزمەت، كۇشتىك قۇرىلىمدار ماماندارى مەن ەرىكتىلەرگە، سونداي-اق، جەرلەستەرىمە كومەكتەرى ءۇشىن زور العىسىمدى بىلدىرەمىن! وسىناۋ قيىن كەزەڭدە سابىرلىق ساقتاپ، ءبىر-بىرىمىزگە قولداۋ كورسەتۋدى جالعاستىرايىق! سونداي-اق، سۋ تاسقىنى بويىنشا قالىپتاسقان جاعداي بويىنشا بارشا تۇرعىندار مەن ب ا ق وكىلدەرىنىڭ تەك رەسمي اقپارات كوزدەرىنە سەنۋىن سۇرايمىن»، - دەدى باتىس قازاقستان وبلىسىنىڭ اكىمى.

ەسكە سالا كەتەيىك، بۇدان بۇرىن باتىس قازاقستان وبلىسىندا سۋعا كەتكەن 552 ءۇيدىڭ 292 سى جارامسىز ەكەندىگىن جازعان بولاتىنبىز.

سونداي-اق جايىق وزەنىنىڭ دەڭگەيى ورال قالاسى تۇسىندا 685 سانتيمەترگە جەتتى.

ورال قالاسىندا 1957 -جىلعى جاعداي قايتالانۋى مۇمكىن.