رەسەيدىڭ مۇناي ەكسپورتىنان تۇسەتىن تابىسى تومەندەدى

استانا. KAZINFORM - رەسەيدىڭ شيكى مۇناي ەكسپورتىنان تۇسەتىن كىرىسى ەنەرگيا باعاسىنىڭ تومەندەۋىنە بايلانىستى سوڭعى ەكى جىلداعى ەڭ تومەنگى دەڭگەيگە دەيىن ءتۇستى، دەپ حابارلايدى Bloomberg.

تانكەر دەرەكتەرىنە سايكەس، ءتورت اپتا ىشىندە رەسەيدەن 25-مامىرعا دەيىنگى ورتاشا تاۋلىكتىك مۇناي جەتكىزىلىمى 3,39 ميلليون باررەلدى قۇرادى، بۇل وتكەن كەزەڭمەن سالىستىرعاندا 10000 باررەلگە از. الايدا ەكسپورتتالعان مۇنايدىڭ جالپى قۇنى 2023-جىلدىڭ ساۋىرىنەن بەرگى ەڭ تومەنگى دەڭگەيگە ءتۇستى.

مۇناي ەكسپورتىنان تۇسكەن كىرىس 25-مامىردا اياقتالعان اپتادا 20 ميلليون دوللارعا (1 پايىز) ازايىپ، 1,26 ميلليارد دوللارعا جەتتى، بۇل - رەسەيدىڭ تەڭىزدەگى شيكى مۇناي ەكسپورتى قۇنىنىڭ 13 ايدان استام قاتارىنان سوڭعى تومەندەۋى.

2024-جىلدىڭ 21-ساۋىرىنەن باستاپ ەكسپورتتىق كىرىس اپتاسىنا شامامەن 1,95 ميلليارد دوللارعا جەتكەن كەزدە رەسەيلىك مۇنايدىڭ باعاسى 28 پايىزعا، ال جەتكىزىلىم كولەمى شامامەن 8 پايىزعا تومەندەدى. Bloomberg بۇل ساندارعا سانكتسيالاردىڭ قانشالىقتى اسەر ەتكەنى بەلگىسىز ەكەنىن اتاپ ءوتتى.

ءساۋىر ايىندا رەسەي شيكى مۇناي مەن مۇناي ونىمدەرىنىڭ ەكسپورتىنان 13,2 ميلليارد دوللار الدى، بۇل - سوڭعى ەكى جىلداعى ەڭ تومەن كورسەتكىش. مەملەكەتتىك دۋما 2025-جىلى مۇناي مەن گاز كىرىسىنىڭ ايتارلىقتاي تومەندەۋى جاعدايىندا فەدەرالدى بيۋجەتتى تولتىرۋ ءۇشىن سالىقتى كوتەرۋ مۇمكىندىگىن تاعى دا تالقىلاپ جاتىر.

ەسكە سالا كەتەيىك، ەو رەسەي مۇنايىنىڭ باعاسىن 50 دوللارعا دەيىن تومەندەتۋدى ۇسىنباق.