رەسەيدىڭ بىرنەشە قالاسىندا قازاق مەكتەبى اشىلۋى مۇمكىن
استانا. KAZINFORM - رەسەي فەدەراتسياسىنىڭ بىرنەشە قالاسىندا قازاق مەكتەبىن اشۋ ماسەلەسى ەكىجاقتى تالقىلانىپ جاتىر. بۇل تۋرالى وقۋ-اعارتۋ ءمينيسترى عاني بەيسەمبايەۆ ءمالىم ەتتى.
«ءيا، بۇل ماسەلە تالقىلانىپ جاتىر، ءۇش ايماق قاراستىرىلىپ وتىر استراحان، ورىنبور جانە ومبى نەمەسە تومبى ناقتى ەسىمدە جوق. قازاق دياسپوراسى شوعىرلانعان ايماقتاردا قازاق مەكتەبىن اشۋ مۇمكىندىگى قارالىپ جاتىر. جۇمىستى رەسەيلىك ارىپتەستەرىمىزبەن بىرلەسىپ جۇرگىزەمىز»، - دەدى عاني بەيسەمبايەۆ ءماجىلىس وتىرىسى بارىسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.
وسىلايشا، مينيستر رەسەيدە قازاق مەكتەبىن اشۋ ۇسىنىسى قولداۋ تاپقانىن راستادى.
«بۇعان دەيىن رەسەيدىڭ ەلىمىزدىڭ وڭتۇستىگىندە مەكتەپ سالۋ جوسپارى تۋرالى ايتىلعان ەدى. بۇل دا تالقىلانىپ جاتىر، جەلتوقساندا ناقتى شەشىم قابىلدانادى»، - دەپ تولىقتىردى ۆەدومستۆو باسشىسى.
ەسكە سالساق، قازاقستان پرەزيدەنتى قاسىم-جومارت توقايەۆ «يزۆەستيا» گازەتىنە جاريالانعان ماقالاسىندا رەسەي قالالارىندا قازاقستان مەكتەپتەرى اشىلاتىنىنا سەنەتىنىن ايتقان ەدى. سونداي-اق ومبىدا ءال-فارابي اتىنداعى قازاق ۇلتتىق ۋنيۆەرسيتەتىنىڭ وكىلدىگىن اشۋ جوسپارى جايلى حابارلاعان بولاتىنبىز.
ايتا كەتەيىك، بۇعان دەيىن ۆلاديمير پۋتيننىڭ قازاقستان مەن رەسەي ىنتىماقتاستىعى تۋرالى ماقالاسى جاريالاندى.
