رەسەيدىڭ اتىراۋمەن شەكارالاس استراحان وبلىسىندا سالماعى 78 كەلى قاربىز ءوسىرىلدى
اتىراۋ. KAZINFORM - رەسەي فدەراتسياسىنىڭ اتىراۋ وبلىسىمەن شەكارالاس استراحان وڭىرىندە سالماعى 78 كەلى تارتاتىن الىپ قاربىز ءوسىرىلدى.
استراحان وبلىسى گۋبەرناتورى باسپا ءسوز قىزمەتىنىڭ مالىمەتىنشە، الىپ قاربىز كاميل مامەدوۆ ءوزى جەتەكشىلىك ەتەتىن شارۋاشىلىقتا وسىرگەن. شارۋاگەر ەنوتايەۆ اۋدانىندا تۇرادى.
«استراحان وبلىسىندا وتكەن اگروفەستيۆالگە 200 دەن استام شارۋاشىلىق قاتىسىپ، قاربىز، قاۋىن سەكىلدى باقشا داقىلدارىن، وزگە دە اۋىل شارۋاشىلىعى ونىمدەرىن ۇسىندى. اۋىل شارۋاشىلىعى ونىمدەرىن كورىپ، ءدام تاتۋعا 12 مىڭ ادام كەلدى. قازىلار القاسى 6 نوميناتسيامەن ەڭ ءدامدى، ەڭ ساپالى قاربىز بەن قاۋىن وسىرۋشىلەردى انىقتادى. بيىل ەنوتايەۆ اۋدانىندا تۇراتىن كاميل مامەدوۆ ءوزىنىڭ شارۋاشىلىعىندا ەڭ الىپ قاربىزدى ءوسىرىپ شىعاردى. «كارولينا كروسس» سورتتى قاربىزدىڭ سالماعى - 78 كەلى»، - دەپ حابارلادى گۋبەرناتوردىڭ باسپا ءسوز قىزمەتى.
ەسكە سالا كەتەلىك، بۇعان دەيىن اتىراۋ وبلىسىندا افريكالىق جايىننىڭ شاباعى ءوسىرىلىپ جاتقانىن حابارلاعان ەدىك.
