رەسەيدىڭ الەۋەتى شەكسىز: ترامپ پۋتينمەن سويلەسكەنىن جوعارى باعالادى

استانا. KAZINFORM - ا ق ش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن تەلەفون ارقىلى اڭگىمەسىن وڭ باعالاپ، رەسەي مەن ۋكراينا اراسىنداعى كەلىسسوزدەردىڭ «جەدەل» باستالاتىنىن مالىمدەدى، دەپ حابارلايدى Kazinform ءتىلشىسى.

- جاڭا عانا رەسەي پرەزيدەنتى ۆلاديمير پۋتينمەن ەكى ساعاتتىق تەلەفون اڭگىمەم اياقتالدى. مەن بۇل اڭگىمەنىڭ وتە جاقسى وتكەنىن ايتا الامىن. رەسەي مەن ۋكراينا دەرەۋ اتىستى توقتاتۋ جانە، ودان دا ماڭىزدىسى، سوعىستى توقتاتۋ جونىندە كەلىسسوزدەر باستايدى، - دەپ جازدى دونالد ترامپ Truth Social جەلىسىندە.

ا ق ش پرەزيدەنتى ەكى تاراپ كەلىسسوزدەردىڭ ناقتى شارتتارىن ءوزارا كەلىسەتىنىن، ويتكەنى «ولار باسقالار بىلمەيتىن ماڭىزدى جايتتاردان» حاباردار ەكەنىن ايتتى.

- بۇل قاندى قىرعىن سوعىس اياقتالعاننان كەيىن، رەسەي ا ق ش- پەن اۋقىمدى ساۋدا قاتىناستارىن دامىتقىسى كەلەدى، جانە مەن مۇنى قۇپتايمىن. رەسەيدە جۇمىس ورىندارىن كوپتەپ اشۋعا جانە حالىقتىڭ ءال- اۋقاتىن ارتتىرۋعا زور مۇمكىندىك بار. ونىڭ الەۋەتى شەكسىز. ۋكراينا دا ءوز ەلىن قالپىنا كەلتىرۋ كەزىندە ساۋدادان ۇلكەن پايدا تابا الادى، - دەدى ترامپ.

دونالد ترامپ كەلىسسوزدەردىڭ دەرەۋ باستالاتىنىن اتاپ ءوتتى جانە بۇل جايىندا كەلەسى حالىقارالىق كوشباسشىلاردى حاباردار ەتكەنىن جەتكىزدى:

ۋكراينا پرەزيدەنتى ۆلاديمير زەلەنسكي؛

ەۋروپالىق كوميسسيا پرەزيدەنتى ۋرسۋلا فون دەر ليايەن؛

فرانسيا پرەزيدەنتى ەممانۋەل ماكرون؛

يتاليا پرەمەر- ءمينيسترى دجوردجيا مەلوني؛

گەرمانيا كانسلەرى فريدريح مەرتس؛

فينليانديا پرەزيدەنتى الەكساندر ستۋبب.

سونىمەن قاتار، ۆاتيكان دا، ريم پاپاسىنىڭ وكىلدىگى ارقىلى، بۇل كەلىسسوزدەرگە ەرەكشە قىزىعۋشىلىق تانىتقانى اتاپ ءوتىلدى.