رەسەيدە تيك-توك بۇعاتتالۋى مۇمكىن

استانا. KAZINFORM - الەۋمەتتىك جەلىلەر مەن مەسسەندجەرلەردى كاسىبي قولدانۋشىلار قاۋىمداستىعى روسكومنادزورعا رەسەيدە TikTok-تى بۇعاتتاۋدى قاراستىرۋدى ۇسىندى. ساراپشىلار پىكىرىنشە، رەسەيلىك الەۋمەتتىك جەلىلەر وسىنىڭ ارقاسىندا اۋديتورياسىن ارتتىرادى. رەتتەۋشى ءوتىنىشتى قابىلداپ، ونى 8-مامىرعا دەيىن قاراستىرادى، دەپ حابارلايدى ت ا س س اقپارات اگەنتتىگى.

TikTok قوسىمشاسى قازىر رەسەيدە جۇمىس ىستەپ جاتىر، ءبىراق تەك ەكى جىل بۇرىنعى بەينەروليكتەر قولجەتىمدى. قاۋىمداستىقتىڭ ەسكە سالعانىنداي، بلوگەرلەر سول ارقىلى قارالىمنان تۇسكەن تابىستان ايىرىلدى.

«شىن مانىندە، بۇل پلاتفورمانىڭ بۇگىندە رەسەيدە جاسايتىنىنىڭ ءبارى پايدالانۋشىلاردى TikTok-تى الماستىرعان وتاندىق پلاتفورمالاردان الىستاتادى»، - دەپ سانايدى قاۋىمداستىق.

قاۋىمداستىق ماماندارىنىڭ قىسقا بەينەروليكتەر قىزمەتىن پايدالانۋشىلار اراسىندا جۇرگىزگەن ساۋالناماعا سايكەس، ولاردىڭ 70 پايىزى تيك-توك قاراۋدى جالعاستىرۋدا: كەيبىرەۋلەرى ونى ادەتىنشە پايدالانسا، باسقالارى بەينەنىڭ قانشا ەسكىرگەنىنە ءمان بەرمەيدى.

قاۋىمداستىق TikTok-تى پايدالانۋشى دەرەكتەرىنىڭ شەكتەلۋىن تەكسەرۋدى سۇرايدى («جەكە دەرەكتەر تۋرالى» زاڭ)، ويتكەنى الەۋمەتتىك جەلى ءالى دە بەينەلەردى كورۋگە جانە ولاردىڭ استىنا پىكىرلەر قالدىرۋعا مۇمكىندىك بەرىپ وتىر.

قاۋىمداستىقتىڭ اتاپ وتۋىنشە، پلاتفورما 2019 -جىلى دەرەكتەردى لوكاليزاتسيالاۋعا دايىن ەكەنىن بىلدىرگەننەن كەيىن زاڭنىڭ ورىندالۋى تۋرالى قوعامدىق حابارلامالار بولماعان. ساراپشىلار، سونىمەن قاتار، الەۋمەتتىك جەلىدە ۇسىنىس الگوريتمدەرى تۋرالى زاڭعا سايكەستىك بەلگىلەرىن تابا المادى.

ەگەر زاڭ بۇزۋشىلىقتار انىقتالسا، قاۋىمداستىق روسكومنادزوردان «ەڭ قاتاڭ جازالاۋ شاراسى» - رەسەي اۋماعىندا بۇعاتتاۋدى قولدانۋ مۇمكىندىگىن قاراستىرۋدى سۇرايدى.

اۆتور

زارينا تۋعانبايەۆا