رەسەيدە ەسىل مەن توبىلداعى سۋ دەڭگەيى شەكتى دەڭگەيدەن اسىپ كەتتى

استانا. KAZINFORM - رەسەيدىڭ تۇمەن جانە قورعان وبلىستارىندا ەسىل جانە توبىل وزەندەرىندەگى سۋ دەڭگەيى شەكتى دەڭگەيدەن اسىپ، ءالى دە كوبەيىپ جاتىر.

تۇمەن وبلىسىندا بوگەتتەردىڭ جارىلۋى نەمەسە سول ارقىلى سۋ كولەمىنىڭ ارتۋ قاۋپى ارتىپ كەلەدى. قازان جانە ەسىل اۋداندارىنىڭ ءبىرقاتار ەلدى مەكەندەرىندە شۇعىل ەۆاكۋاتسيا جۇرگىزىلىپ جاتىر.

تۇمەن وبلىسى بيلىگىنىڭ مالىمەتىنشە، ەسىل وزەنىندەگى سۋدىڭ ناقتى دەڭگەيى 33 تەن 76 س م- گە دەيىن كوتەرىلگەن. قازاقستانمەن شەكاراداعى يلينكا اۋىلىندا ەسىل دەڭگەيى 2017 -جىلداعى تاريحي ماكسيمۋمنان 49 س م- گە اسىپ، 884 س م- گە جەتتى.

تۇمەن وبلىسىنىڭ گۋبەرناتورى الەكساندر موور تۇرعىندارعا ارناعان ۆيدەوۇندەۋىندە روسگيدرومەتتىڭ جاڭارتىلعان بولجامى بويىنشا ەسىل وزەنىندەگى سۋدىڭ كوتەرىلۋى ءساۋىر ايىنىڭ باسىنداعى اقپاراتپەن سالىستىرعاندا ايتارلىقتاي جوعارى بولاتىنىن ايتتى. وسىعان بايلانىستى سۋ باسۋ قاۋپى جوعارى ەلدى مەكەندەردىڭ سانى ارتتى.

«سۋ دەڭگەيى ءالى دە ارتادى دەپ جاتىر. بوگەتتەردىڭ بۇزىلۋى نەمەسە تولىپ كەتۋ ىقتيمالدىعى ارتىپ كەلەدى. سوندىقتان ءبىز تۇرعىنداردى شۇعىل ەۆاكۋاتسيالاۋدى باستاپ جاتىرمىز. ءبىزدىڭ ماماندار الدىن الا سۋ قاۋپى بار ايماقتارداعى بارلىق ءۇيدى ارالاپ شىقتى. قاۋىپتى ءبارىڭىز ءبىلىپ وتىرسىزدار. باعالى زاتتارىڭىزدى جيناپ، دەرەۋ قاۋىپسىز جەرگە - تۋىستارىڭىزعا نەمەسە ۋاقىتشا ەۆاكۋاتسيا ورتالىقتارىنا بارىڭىزدار. ۋاقىتشا ورنالاستىرۋ ورتالىقتارىندا سىزدەرگە قاجەتتىنىڭ بارلىعىن بەرەمىز. جاعداي وتە اۋىر»، - دەدى الەكساندر موور حالىققا جاساعان ۇندەۋىندە.

قورعان وبلىسىندا توبىل وزەنىندەگى سۋ تاسقىنىنا بايلانىستى قيىن جاعداي قالىپتاسىپ وتىر. قورعان وبلىستىق توتەنشە جاعدايلار دەپارتامەنتىنىڭ مالىمەتىنشە، التى مۋنيتسيپاليتەتتە، 25 ەلدى مەكەندە، 669 تۇرعىن ءۇي مەن 2376 ساياجايدا، سۋى تومەن 5 كوپىر مەن 9 جول ۋچاسكەسىن سۋ باسقان.

ءارتۇرلى ەلدى مەكەندەردە 13567 ادام ەۆاكۋاتسيالاندى، سىيىمدىلىعى 5 مىڭنان استام ادامدى قۇرايتىن 16 ۋاقىتشا ورنالاستىرۋ پۋنكتى اشىلدى. وندا 900 دەن استام ادام ورنالاستىرىلعان. قورعاندا بوگەتتىڭ جوتاسى 11-11,5 مەترگە دەيىن ۇلعايتىلدى. بۇل سۋدىڭ بولجامدى كوتەرىلۋ دەڭگەيىنە شامامەن 2 مەترلىك قور بولىپ سانالادى.

ەڭ اۋىر سۋ تاسقىنى باتىس قازاقستان وبلىسىمەن شەكارالاس ەلەك اۋىلىندا بولدى. ءساۋىردىڭ 17- كۇنى تاڭەرتەڭ اۋىل ماڭىنداعى سۋ دەڭگەيى 918 سم بولدى. بۇعان دەيىن بۇل جەرگە قوسىمشا قۇتقارۋ كۇشتەرى جىبەرىلگەن بولاتىن. ناتيجەسىندە تاسقىنعا قارسى قۇرىلىمداردى الدىن الا نىعايتىپ، ۇزىندىعى ءبىر شاقىرىمعا جۋىق سۋ تولتىراتىن بوگەت ورناتۋعا مۇمكىندىك تۋدى.

ورىنبور وبلىسى ۇكىمەتى باسپا ءسوز قىزمەتىنىڭ حابارلاۋىنشا، ورىنبوردا 11200 شارۋاشىلىق ۋچاسكەلەرى مەن 6527 شارۋاشىلىقتى، ونىڭ ىشىندە 55 كوپقاباتتى ءۇيدى سۋ باسقان. وبلىس ورتالىعىنىڭ اينالاسىنداعى جاڭا اۋماقتاردى سۋ باسۋ قاۋپى بار، تۇرعىندارعا تەز ارادا ۇيلەرىنەن كەتۋ ۇسىنىلدى.